Mektepter qalypty rejımde jumys isteıdi: QR BǴM qashyqtan oqytýdyń ekinshi aptasy týraly
NUR-SULTAN. QazAqparat - Qazaqstanda oqýshylardy qashyqtan oqytýdyń ekinshi aptasy aıaqtaldy.
«Onyń qorytyndysy qandaı, sabaq qalaı ótip jatyr jáne qansha oqýshynyń kompıýtermen qamtamasyz etilgeni týraly materıaldan oqyńyzdar», dep jazady QR Úkimetiniń resmı saıtynda.
QR bilim jáne ǵylym vıtse-mınıstri Sholpan Karınova atap ótkendeı, IV toqsannyń ekinshi aptasynyń qorytyndysy qashyqtan oqytý rejıminde barlyq mektepter jumys istep jatqanyn kórsetedi.
Esterińizge sala keteıik, qashyqtan oqytý birneshe formatta júrgiziledi:
1. Internet-platformalar arqyly jumys isteý;
2. «El arna» jáne «Balapan» telearnalary arqyly ótkiziletin televızııalyq sabaqtar;
3. «Qazaq radiosy» radıoarnasy arqyly oqytý;
4. Poshta arqyly oqytý. Qazaqstanda 5-10 bala turatyn jáne mektebi joq 1000-nan astam eldi meken bar. Buǵan deıin bul balalar sabaq oqý úshin tirek eldi mekenderge kún saıyn jetkiziletin. Mundaı eldi mekenderge oqý materıaldary men tapsyrmalar poshta baılanysy arqyly jiberiledi jáne keri baılanys ta osylaı ornaıdy.
Sh. Karınovanyń aıtýynsha, búgingi tańda 2,4 mln-nan astam oqýshy men pedagog «Bilimland», «Daryn Online», «Kundelik» ınternet-platformalaryn paıdalanady.
Qazirgi ýaqytta jergilikti atqarýshy organdar mektepterde bolǵan 250 myń kompıýterdi taratyp berdi. 11 myńnan astam jańa kompıýterler satyp alyndy, olar da oqýshylar men pedagogtar arasynda úlestiriledi. Sonymen qatar, oqýshylar tegin ınternetpen qamtamasyz etiledi.
800 myńnan astam oqýshy ekinshi format boıynsha bilim alýda — televızııalyq sabaqtardy qaraıdy. Bul sanattaǵy oqýshylar úshin muǵalimder qoljetimdi messendjerler men «Kundelik» elektrondyq jýrnaly arqyly keri baılanys ornatady.
Búginde «El arna» jáne «Balapan» telearnalary arqyly 700-den asa sabaq kórsetildi. IV toqsandy tolyq jabý úshin 3 360-tan asa telesabaq túsirý kerek. Nur-Sultan qalasynyń mektepteriniń jáne Nazarbaev zııatkerlik mektepteriniń pedagogteri sabaqtardy túsirý jumystaryn jalǵastyrýda.
«Búginde biz ata-analardyń tarapynan belsendiliktiń artqanyn kórip otyrmyz. Pedagogter men ata-analarǵa qashyqtaǵy formatta júrgizip jatqan jumystary úshin taǵy da alǵys aıtyqymz keledi», — dedi Sh. Karınova.
Qashyqtan oqytý kezindegi BJB jáne TJB
Sholpan Karınova qashyqtan oqytýda mektep oqýshylarynyń bólim boıynsha jıyntyq baǵalaý (BJB) men toqsandyq jıyntyq baǵalaýdy (TJB) tapsyrý qarastyrylǵanyn habarlady. Bul rette, osy toqsanda BJB tek bir ret ótkiziledi.
«Elimizdegi barlyq mektepterde IV oqý toqsanynyń ortasynan bastap BJB emtıhany ótkiziletin bolady, al toqsan sońynda TJB ótkiziledi», — dedi vıtse-mınıstr.
Buǵan deıin belgili bolǵandaı, bıyl 9,11 synyptardyń túlekteri qorytyndy jáne memlekettik emtıhandardy tapsyrmaıdy. Negizgi orta jáne jalpy orta bilim týraly attestattar olarǵa jyldyq baǵanyń negizinde beriletin bolady.
Sońǵy qońyraýǵa kelsek, vıtse-mınıstr atap aıtqandaı, 2020 jyly eger qashyqtan oqytýǵa baılanysty jaǵdaı ózgermeıtin bolsa, bul shara ótkizilmeıdi.
