Mektepter beınebaqylaý júıesimen 100 paıyz qamtyldy – mınıstr

NUR-SULTAN. QazAqparat - Mektepter beınebaqylaý júıesimen 100 paıyz qamtamasyz etildi. Bul týraly Bilim jáne ǵylym mınıstrliginiń alqa májilisinde vedomstvo basshysy Ashat Aımaǵambetov málim etti, dep habarlaıdy QazAqparat tilshisi.

«Orta bilim berýde jańartylǵan mazmunǵa kóshý aıaqtaldy, 100 paıyz kóshtik. Balalardyń qaýipsizdigin qamtamasyz etý maqsatynda barlyq óńirde mektepterdi beınebaqylaý júıesimen 100 paıyz, jyly ájethanalarmen 99 paıyz qamtamasyz etildi», - dedi mınıstr.

Onyń aıtýynsha, orta bilim berý júıesiniń negizgi problemalarynyń biri - ol qala jáne aýyl mektepteri arasyndaǵy bilim sapasynyń alshaqtyǵy.

«Osy máseleni sheshý joldaryn pysyqtadyq. Sonyń ishinde «Oqýǵa qushtar mektep» jobasyn iske qosyp jatyrmyz. Onyń aıasynda memlekettik tildegi kórkem ádebıettiń mektep kitaphana qorynda aıtarlyqtaı jańartý mindeti tur. Osy baǵyttaǵy jumystardy bıyl sheshý kerek. Sonymen qatar, kitaphanashylardyń jalaqysyn kóterý máselesi de óte mańyzdy. Bul boıynsha tıisti tapsyrmany Memleket basshysy júktegen edi. Sondyqtan osy jumysty bıyl jalǵastyramyz», - dedi A. Aımaǵambetov.