Mektepter ata-analardan jumys ornynan anyqtamany talap ete almaıdy
ASTANA. QazAqparat - Mektepter ata-analardan jumys ornynan anyqtamany talap ete almaıdy. Bul týraly búgin Astana qalasy Bilim basqarmasy basshysynyń mindetin atqarýshy Ánýar Janǵozın málim etti, dep habarlaıdy QazAqparat.
«Bul suraqty ata-analar jıi qoıyp jatady. Jumys ornynan anyqtama talap etý quqyqqa qaıshy. Ózderińiz bilesizder, balalardy mektepke qabyldaý memlekettik qyzmet bolyp tabylady jáne ol standartqa sáıkes júzege asyrylady. Standart boıynsha tıisti qujattar tizbesi bekitilgen»,-dep túsindirdi Janǵozın Ortalyq kommýnıkatsııalar qyzmetindegi baspasóz máslıhatynda.
Onyń sózine qaraǵanda, qujattar tizbesinde balanyń ata-anasynan nemese resmı ókilinen ótinim, medıtsınalyq tólqujat, 3h4 kólemindegi eki fotosýret, turǵylyqty jerden anyqtama, ıaǵnı mekenjaı anyqtamasy nemese páterdi jalǵa alý qujaty qamtylǵan. Atap aıtqanda, mektep tek osy qujattardy ǵana surata alady.
«Qalǵandary atalǵan memlekettik qyzmettiń standartyna jatpaıdyqtan, olar artyq qujattardy surata almaıdy. Sondyqtan osy tektes jaǵdaılar týyndasa, onda bizge ótinim jasaı alasyzdar. Biz óz kezegimizde ár mektep boıynsha sheshim shyǵaramyz»,-dedi ol.
