Mektepten tys uıymdardy básekelestik ortaǵa berýdi toqtatý kerek - Aımaǵambetov
NUR-SULTAN. QazAqparat - 2020 jyly 100 jekemenshik jańa mektep salynady. Bul týraly QR Bilim jáne ǵylym mınıstrliginiń keńeıtilgen alqa otyrysynda vedomstvo basshysy Ashat Aımaǵambetov aıtty, dep habarlaıdy QazAqparat tilshisi.
«Aldyńǵy jyly alǵash ret 70 mektep paıdalanýǵa berilgen. Bul sońǵy 71 jyldaǵy eń joǵary kórsetkish. 2020 jyly bizdiń josparymyzǵa sáıkes 100 jańa jekemenshik mektep salynyp, paıdalanýǵa beriledi. Ary qaraı da osy saıasatty júrgizemiz», - dedi mınıstr.
Onyń atap ótýinshe, elimizde jyl saıyn apatty jaǵdaıdaǵy mektepterdiń sany azaıyp kele jatyr. Biraq, úsh aýysymda oqytatyn mektepterdiń máselesi áli de sheshilmegen. Buǵan qosa, balalardy sabaqtan tys qosymsha bilim berýmen qamtý tómen qalyp otyr.
«Ony biz aıtýymyz kerek. Bizde mektepishilik úıirmeler men is-sharalar týraly ádemi sandar bar. Bilim berý protsesinde osynyń bárin aıtamyz. Biraq, shyn máninde onyń mazmunyna qarasaq, onda aýyz toltyryp aıtatyn másele óte az. Bul rette jekelegen óńirler mektepten tys uıymdardy básekelestik ortaǵa berýde. Olardy beıindi emes aktıv retinde satýda. Oǵan árıne, jol berýge bolmaıdy. Sondyqtan osy máseleni toqtatý kerek dep sanaımyz. Odan da kerisinshe biz qosymsha bilim berý uıymdaryn, balalar saraıyn kóbeıtýimiz kerek. Olardy salyp, sanyn kóbeıtý máselesi jańa baǵdarlamada belgilengen. Sondyqtan biz bul saıasatty qoldamaımyz», - dedi Ashat Aımaǵambetov.
