Mektepten tys jerde oqys oqıǵa bolsa, oǵan ustaz jaýapty emes - Prezıdent

ASTANA. KAZINFORM - Mektepten tys jerde, ata-analardyń jaýapsyzdyǵynan oqys oqıǵa bolsa, oǵan ustaz jaýapty emes. Bul týraly elordada ótip jatqan ustazdardyń respýblıkalyq tamyz konferentsııasynda Memleket basshysy Qasym-Jomart Toqaev aıtty.

- Muǵalimniń quqyǵyn qorǵaý máselesi árdaıym basty nazarda bolýǵa tıis. Men sóz basynda ustazdardyń óz mindetinen tys jumystardan bosatylǵanyn aıttym. Biraq, keıde jergilikti bılik ókilderi zań talaptaryn óreskel buzyp jatady. Prokýratýra organdary mundaı zań buzýshylyqtarǵa tosqaýyl qoıýy kerek. Sondaı-aq balalarǵa qatysty kez kelgen jazataıym jaǵdaı úshin de muǵalimdi jazalaý orynsyz dep sanaımyn. Mektepten tys jerde, ata-analardyń jaýapsyzdyǵynan oqys oqıǵa bolsa, oǵan ustaz jaýapty emes, - dedi Qasym-Jomart Toqaev.

Memleket basshysy Almaty oblysynda túlekter arasynda bolǵan qaıǵyly jaǵdaı úshin dırektor men muǵalimder jaýapqa tartylyp, jumystan shyǵarylǵanyn eske saldy.

- Mınıstrlik olardyń múddesin qorǵap qaldy. Durys. Biz mundaı keleńsizdikke jol bermeýimiz kerek. «Pedagog mártebesi týraly» zańǵa ustaz quqyǵyn qorǵaý jóninde ózgerister engizý qajet dep sanaımyn. Memlekettiń mindeti – muǵalimniń qoǵamdaǵy bedelin jáne mártebesin meılinshe arttyrý, - dedi Memleket basshysy.

Prezıdent Mańǵystaýda balalardyń sapasyz tamaqtan ýlanyp qalý oqıǵasyna da nazar aýdartty.

- Osy sumdyq jaǵdaıdan keıin mekteptegi tamaqtyń sapasyn qadaǵalaý jumysyn Densaýlyq saqtaý mınıstrligi tolyǵymen óz mindetine aldy. Bul óte durys sheshim boldy. Jalpy, bilim salasy – memleket úshin strategııalyq máni bar sala. Sondyqtan, quzyrly memlekettik organdar bilim salasyndaǵy máselelerden syrt qalmaýy kerek. Túptep kelgende, balalardyń amandyǵy, olardyń densaýlyǵy jáne sapaly bilim alýy – elimizdiń keleshegine tikeleı qatysy bar másele, - dedi Qasym-Jomart Toqaev.

Memleket basshysynyń paıymynsha, muǵalimder memlekettik mańyzy bar jumysty atqaryp jatyr. 

Degenmen, ustazdyń nazary bala oqytý isinde bolýǵa tıis.