«Mekteptegi oqýlyqtyń balamaly túrinen bas tartý qajet pe?» - baspasózge sholý
***
El gazeti «Egemen Qazaqstannyń» búgingi sanynda QR Joǵarǵy Sotynyń Tóraǵasy Qaırat Mámıdiń «Sot ashyqtyǵy - qoǵam aınasy» degen taqyryppen kólemdi maqalasy jaryq kórdi. Maqala avtorynyń jazýynsha, zańdyq kúshine enbegen sot aktilerin buqaralyq aqparat quraldarynda jarııalap, kópshilik talqysyna shyǵarý - syrttaı sot isine aralasýdaǵy óreskeldik. Bul - sýdıanyń táýelsizdigine nuqsan keltirý ekenin keıbir azamattar túsinbeıdi. Biz osy bir keleńsiz jaıttyń qoǵamda oryn almaýyna jurtshylyq bolyp atsalysýymyz kerek. «Onyń ishinde, qandaı buqaralyq aqparat quraldary bolsyn, mundaı óreskeldikke boı aldyrmaýlary qajet dep oılaımyn. Osyǵan baılanysty aıtarym, taraptar isterdiń sot satylarynda qaralý quzyrynyń arajigin zań talabyna saı ajyrata bilgenderi jón. Árbir tarap zańda belgilengen tártippen, kelesi satydaǵy sotqa ótinish berip, azamattyq quqyǵyn zańdy qorǵaý úshin izdense, sot ádildiginiń shynaıy saqtalýyna óziniń de úlesin qosqan bolar edi», - dep jazady Q.Mámı.
***
«Aıqyn» gazetiniń búgingi sanynda belgili folklortanýshy Berik Júsipovpen aradaǵy suhbat «Bazardyń básimen esepteseń, meniń ónerimniń qara baqyrlyq ta quny joq» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Aıtpasań sózdiń atasy óledi! Bizdiń qazaq ǵylymy, onyń ishinde men ózimdi erkin sezinetin folklorıstıka, kýltýrologııa men etnomýzykataný bul kúnde shalys óreli kúliktiń kúnin keship keledi. Keshegi poskeńestik keńistik tóńireginen bizdiń arqandaýly attaı bolyp júrgen mamandarymyzdan artyq adam tabamyn deý bekershilik. Biz sol kezdegi ǵylym deńgeıin orys pen evreılerdiń ózinen asyryp jibermesek, básin túsirgen joqpyz! Átteń, «kebenek» ishinde júrgen bizdiń ulttyq ǵylym jáne sol salamen aınalysatyn mamandar áleýmettik jaǵynan qamtamasyz etiletin kún bolsa, bárin jıyp tastap, qalǵan sanaly ǵumyrdy osy jolǵa jumsasam, kezegi kelgen kúnimizde moldekeńder aıta beretin jaqqa da ókinishsiz kete berýge bolar edi. Sal-serilik dep atalatyn sol uly úrdistiń kóleńkesinde Mańǵystaýdaǵy sáıkiler men qaıqylardyń, Syr boıyndaǵy qasqalardyń tarıhy da tumsa kúıinde zerttelýsiz qalyp bara jatyr. Ǵylymǵa, sol ǵylymmen aınalysatyn ǵalymǵa qoldaý kórsetilmeıtin qoǵamda ómir súrip jatqanymyz úlken ókinish!», - deıdi.
Kúni keshe Parlament Májilisinde ótken Úkimet saǵatynda palata vıtse-spıkeri Darıǵa Nazarbaeva mektepterdegi oqýlyqtyń balamaly túrinen bas tartý qajettigin basa aıtqan bolatyn. Dál osy máseleni elimizge belgili pedagogterge «Aıqyn» gazeti saýal retinde joldap, olardyń pikirin « Mekteptegi oqýlyqtyń balamaly túrinen bas tartý qajet pe?» degen taqyryppen usyndy. Máselen, №138 qazaq gımnazııasynyń muǵalimi, pedagogıka ǵylymdarynyń doktory, professor Uljalǵas Esnazarova osy saýalǵa oraı bir ǵana oqýlyqpen bilim alý kerek degen ıdeıaǵa qarsy ekendigin ashyq aıtqan. Al №159 mektep gımnazııa dırektory, Qazaqstannyń Eńbek Eri Aıagúl Mırazova: «Darıǵa Nursultanqyzynyń kóterip júrgen máselesi óte oryndy. Árıne, bul búgingi mınıstrdiń jasap otyrǵany emes. Biraz jyldan beri qordalanyp qalǵan jaǵdaı. Jalpy, mektep standarttaryn qaıta-qaıta ózgertý, oqýlyqtardy jyl saıyn jańartý, avtorlardyń ózgere berýi menińshe bilimge úlken ózgeris ákeledi dep oılamaımyn. Kerisinshe, bilimniń sapasyzdyǵyna alyp keledi», - deıdi.
***
«Kazahstanskaıa pravda» gazetiniń jazýynsha, Elbasy Nursultan Nazarbaev «Báıterek» «Ulttyq basqarýshy holdıngi» AQ basqarmasy tóraǵasy Qýandyq Bıshimbaevty qabyldadyi. Kezdesýde Q.Bıshimbaev Memleket basshysyna «Báıterek» holdınginiń 2013 jylǵy qyzmetiniń nátıjeleri, sondaı-aq, holdıngtiń kompanııalar toby júzege asyryp jatqan ınvestıtsııalyq jobalar týraly baıandady. Qazaqstan Prezıdenti «Báıterek» holdıngine kiretin damý ınstıtýttary «Samuryq-Qazyna» AQ iske asyratyn transformatsııalar jónindegi sharalardy nazarǵa alǵany jón ekenin atap ótti. Sonymen qatar, Nursultan Nazarbaev shaǵyn jáne orta bıznesti qarjylandyrýǵa memleket bólgen qarajat ekonomıkany odan ári damytýǵa oń áserin tıgizý maqsatynda tıimdi ıgerilýge tıistigine toqtaldy.
***
Qaraǵandy qoqysqa batyp barady. Qala tóńireginde 7 mln. tonna sasyǵan qaldyq jınalyp qalǵan. Bul jaıynda «Vremıa» gazetiniń búgingi nómirinde «Svalochnyı greh» degen taqyryptaǵy maqalada keńinen baıandalǵan. Basylymnyń jazýynsha, bul turmystyq qaldyqtyń barlyǵy oblys aımaǵynda ornalasqan 213 polıgonda jınalǵan kórinedi. ***
«Baspasózde shýǵa aınalǵan Qaraǵandy ákimdiginiń 1,5 mln. dollarǵa eki bólmeli páter satyp alady degen aqparat shyndyqqa esh janaspaıdy», - dep jazady «Ekspress K» gazeti sársenbilik sanyndaǵy «Dvýshka legkogo povedenııa» degen taqyryptaǵy maqalada. Basylymnyń jazýynsha, oblys ortalyǵyndaǵy 2 bólmeli páterdiń ortasha quny 55-den 70 myń dollarǵa deıin baǵalanady. Sondyqtan da 1,5 mln. dollarǵa páter satyp alynatyndaǵy jaıly aqparattyń halyqty dúrliktiretindigi anyq jaıt. «Shyn máninde Qaraǵandy qalasynyń qurylys bólimi «Qoljetimdi baspana-2020» baǵdarlamasy aıasynda páterler satyp alýǵa elektrondy baıqaý jarııalady. jalpy kólemi 3265 sharshy metrdi quraıtyn 1 jáne 2 bólmeli páterler jas otbasylarǵa beriledi. Buǵan qarjy respýblıkalyq bıýdjetten bólingen», - deıdi qala ákimdiginiń baspasóz hatshysy Irına Kamysheva.
