Mekteptegi mol dastarhan: Aqtóbedegi bilim basqarmasy túsinik berdi
AQTÓBE. QazAqparat - Aqtóbeniń Baıǵanın aýdanynda komıssııa músheleri úshin mektepte dastarhan jaıylǵan. Oblystyq bilim basqarmasy árqaısysynan túsinikteme alady, dep habarlaıdy QazAqparat tilshisi.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti mán-jaıdy anyqtaý úshin bilim basqarmasyna materıaldardy joldady. Al «Aqtóbe - adaldyq alańy» jobalyq keńsesi arqyly tikeleı efır suraqtaryna jaýap bergen bilim basqarmasynyń basshysy Lázzat Orazbaeva tekserý bastalǵanyn málimdedi.
«Baıǵanın aýdanynda tirkelgen derek boıynsha anyqtaý jumysy júrip jatyr. Mektep dırektory oblys ortalyǵyna shaqyryldy. Negizi jyl basynda qandaı da bir komıssııa kelse de dastarhan jaıyp, kútip alýǵa bolmaıtyny týraly aıtylady. Bul jerde dárigerlik komıssııa densaýlyǵynda aqaýy bar balalardy mektepke nemese balabaqshaǵa jiberý týraly suraqtardy qaraıdy. Sondyqtan olar, komıssııa músheleri 1 myń teńgeden aqsha jınap, adamdar kóp kútip qalmas úshin mektep ishinde túski asqa dastarhan jaıǵan. Bári de anyqtalyp, qosymsha aqparat taratamyz», - dedi oblystyq bilim basqarmasynyń basshysy Lázzat Orazbaeva.
Aqtóbelikterdiń biri basshynyń adaldyǵy týraly suraq qoıdy.
«Men adalmyn. Qandaı da bir kúmán bolsa, kelip aıtýyńyzǵa bolady», - dedi L.Orazbaeva.
