"Mekteptegi quqyqtyq tártip" respýblıkalyq jedel aldyn alý is-sharasynyń alǵashqy kúninde elordalyq 33 jasóspirim ákimshilik jaýapkershilikke tartyldy
ASTANA. Aqpannyń 16-sy. QazAqparat /Marlan Jıembaı/ - Elordada keshe ǵana bastalǵan "Mekteptegi quqyqtyq tártip" jedel aldyn alý is-sharasy barysynda 33 jasóspirim ákimshilik jaýapkershilikke tartyldy. Bul týraly Astana qalalyq ІІD til saıasaty jáne aqparat bóliminiń bastyǵy Nurdildá Oraz málim etti.
Onyń aıtýynsha, alǵashqy kúnnen-aq ákimshilik jaýapkershilikke 38 azamat tartylyp, 39 tulǵa ishki ister bóliminiń aldyn alý esebine tirkelse, sonyń 15-i kámelettik jasqa tolmaǵan jasóspirimder bolyp otyr. Sonymen qatar 24 qolaısyz otbasy anyqtalǵan.
Jedel aldyn alý is-sharasy barysynda qaladaǵy bilim oryndary, kompıýter klýbtary, ınternet-kafe, meıramhana men barlar, saýda núkteleri tekserilgen. 32 oıyn-saýyq orny men 26 kompıýter klýbyn tekserý kezinde túngi ýaqytta júrgen jasóspirimderge baılanysty 5 laýazymdy tulǵaǵa jáne 11 ata-anaǵa ákimshilik hattama toltyrylǵan.
"Іs sharanyń negizgi maqsaty - jasóspirimder qylmysynyń aldyn-alý jáne boldyrmaý. Quqyq buzýshylyqqa beıim jasóspirimder toptarynyń, esirtki jáne psıhotropty zattar qoldanatyn, sabaqtan qashatyn, alkogoldi ishimdikke úıir jasóspirimderdiń jolyn kesý, sonymen qatar jasóspirimderdi osyndaı keleńsiz jaıttarǵa ıtermeleıtin úlkenderdi, sondaı-aq jasóspirimderge alkogoldi ishimdikter men temeki buıymdaryn satatyn azamattardy anyqtaý maqsatynda uıymdastyrylyp otyr", deıdi N.Oraz.
Qazirgi ýaqytta elordada túrli sanat boıynsha 526 jasóspirimniń esepte turǵanyn atap ótken ol "jasóspirimder urynatyn qylmystardyń basym bóligi uıaly telefondardy urlaýǵa qatysty bolyp otyr", dep atap ótti.
Aıta keteıik, "Mekteptegi quqyqtyq tártip" respýblıkalyq jedel aldyn alý is-sharasy aqpannyń 15-19-y aralyǵynda ótýde.
