Mekteptegi qazaq tili oqýshynyń tulǵa bolyp qalyptasýyna kómektespeı otyr - mektep dırektory

ASTANA. 16 mamyr. QazAqparat - Búginde mektep oqýlyqtarynda oqýshynyń fýnktsıonaldyq saýattylyǵyn arttyrý maqsaty baıqalmaıdy. Astanadaǵy Qazaq ulttyq óner ýnıversıtetinde bastalǵan QR Fılologtarynyń I sezinde Abaı atyndaǵy daryndy balalarǵa arnalǵan qazaq tili men ádebıetin tereńdetip oqytý mektebiniń dırektory Muhtar Ybyraıymov osy máseleni erekshe atap ótti.

Onyń aıtýynsha, qazirgi oqýlyqtarda tildiń qurylymyn teorııalyq turǵydan oqytýǵa negizgi basymdyq beriledi. «Orta bilim berý kýrsynyń baǵdarlamasynda til mádenıeti, sóz mádenıeti, sheshendik óner sııaqty sózder atalǵanmen, oqýshynyń bilimin tekseretin qorytyndy attestattaýda bul máseleler aıaqsyz qalyp jatady. Oǵan Ulttyq biryńǵaı testileý aıqyn dálel bola alady. UBT suraqtarynyń bir paıyzy da fýnktsıonaldyq saýattylyqqa negizdelmegen. Onda taza teorııalyq máseleler qamtylǵan», - deıdi M. Ybyraıymov.