Mekteptegi tsıfrlyq orta qandaı bolýy kerek – máseleni BQO muǵalimderi talqylady
Jıynda qazirgi kezde elimizdiń muǵalimderin tolǵandyrǵan bilim berýdi transformatsııalaý, mektepterdegi tsıfrlyq orta, oqýshylardyń belsendiligin arttyrý, zamanaýı ustazǵa qoıylatyn jańa talaptar jáne basqa da ózekti máseleler talqylandy.
«Forým qashyqtan oqytý kezinde muǵalimderdi qoldaý boıynsha júıeli jumystar jáne mektebimizdiń bastamasymen júzege asqan «Jańa zaman muǵalimine arnalǵan tsıfrlyq gaıd» jobasy kezeńderiniń biri boldy. Tsıfrlyq quraldar pedagogter úshin oqý protsesin tıimdi uıymdastyrý jáne oqýshylardyń boıynda HHІ ǵasyr daǵdylaryn damytýdyń zamanaýı ádisine aınalyp otyr», – dedi mektep dırektory Aıdarbek Aıtpýkeshev óz sózinde.
«Nazarbaev qorynyń» bilim berý salasyndaǵy bas sarapshysy Názıpa Aıýbaeva qashyqtan oqytý jaǵdaıynda muǵalimniń reflektıvti tájirıbesiniń mańyzy na toqtaldy. Sondaı-aq ustazdardyń mekteptegi kásibı damýy men birlesken sheberlikteri oqýshylardyń bilim alýyna tıimdi áser etetinin jetkizdi.
EdCrunch University NITÝ «MISıS» ortalyǵynyń dırektory Nurlan Qııasov tsıfrlyq alshaqtyqty qaıta qarastyrý, tehnologııany passıv qoldanýdan belsendi paıdalanýǵa kóshý jáne mekteptegi tsıfrlyq bilim berý ortasyn qalyptastyrý erekshelikterin eskerýge shaqyrdy.
Bilim berýdi transformatsııalaý taqyrybyndaǵy paneldi pikirtalasta A.N.Týpolev atyndaǵy Qazan ulttyq zertteý tehnıkalyq ýnıversıteti (RF) janyndaǵy ınjenerlik lıtseı dırektorynyń orynbasary Indır Halıkov, Oraldaǵy pedagogıkalyq sheberlik ortalyǵynyń menedjer-ádiskeri Gúlnár Esmaǵulova jáne J.Dosmuhamedov atyndaǵy joǵary pedagogıkalyq kolledj dırektorynyń orynbasary Zınýr Muhtar baıandama jasady.
Forýmǵa qatysýshylar ártúrli zamanaýı resýrstardyń ishinen tıimdi tsıfrlyq quraldy qalaı tańdaýǵa bolady, eńbek naryǵy aldaǵy jyldarda qalaı ózgeredi, vırtýaldy álem shynaıy álemge qalaı áser etedi, tabysty oflaın jobany tabysty onlaınǵa qalaı aınaldyrýǵa bolady jáne qazirgi tańdaǵy muǵalimderdiń praktıkasyndaǵy basqa da kókeıkesti máselelerdi talqylady.
«Tsıfrly gaıd» laıfhaktar pavılonynda zııatkerlik mekteptiń úzdik muǵalimderi Pear Deck, LINOIT onlaın taqtasy, CLASSTIME, WORDWALL, Mindmeister servısteri sııaqty onlaın-platformalar, paıdaly veb-saıttar, laıfhaktar men utymdy sheshimderdi tanystyryp, olardyń sabaqta tıimdi qoldanylýyn kórsetti. «Sandyq sabaq» sessııasynda oblystyq jalpy orta mektep muǵalimderi poster túrinde zertteýlerin usyndy.
Forým sońynda NIS muǵalimderiniń AKT daǵdylaryn damytý, qashyqtan oqytýdyń ozyq tájirıbesin taratý jáne muǵalimderdiń shyǵarmashylyq bastamasyn damytý maqsatynda uıymdastyrylǵan «Úzdik onlaın-sabaq» kásibı sheberlik baıqaýynyń qorytyndysy belgili boldy.
Qazirgi zaman sabaǵy – muǵalimniń monology emes, pikirtalas, zertteý men tájirıbe alańy. Muǵalim jetekshilik etedi, yntalandyrady, belsendi oqýǵa jaǵdaı jasaıdy. Sol sebepti muǵalimderdiń kásibıligine qoıylatyn talaptar da artyp keledi – endi olar zamanaýı oqytý ádisterin qoldana bilýi kerek. Forýmǵa qatysýshylar osyndaı ortaq pikirge keldi.
Eske sala keteıik, budan buryn BQO-da jańa geoportaldyń tanystyrylǵanyn jazǵan bolatynbyz.