Mekteptegi býllıngpen kúres – depýtattar óz usynystaryn jarııalady

ASTANA. QazAqparat – Májilis depýtaty Ashat Aımaǵambetov mektepterdegi býllıngpen kúreske qatysty usynysyn aıtty, dep habarlaıdy QazAqparat tilshisi.

Depýtat elimizde býllıng pen balalar quqyǵyn qorǵaý keshendi problema ekenin aıta kele:Biraz jyldar boıy mektepterge psıhologterdiń jetkilikti sanyn alý máselesin kóterip kelemiz. Keıbir áriptester balalar psıhologke barmaıdy degen ýáj aıtyp jatyr. Degenmen, bul syltaý shyndyqqa janaspaıdy. Qazir balalardyń tanym-túsinigi múldem basqa, olar psıhologke barýdy durys qabyldap otyr jáne bul kómekti qajet etedi. Aqparattyń kóptigine baılanysty qazir balalarda belgili bir problema bar ekeni baıqalyp otyr, - dedi A. Aımaǵambetov Májilistiń jalpy otyrysynan keıin tilshiler suraǵyna jaýap bere otyryp.

Onyń paıymynsha, Qazaqstanda psıhologııalyq qyzmetti kúsheıtý qajet. Qazir bir psıhologke shaqqanda 1000-1500 baladan keledi. Sondyqtan, mundaı júktemeni eńserý múmkin emes. Bul rette depýtattar Úkimet aldyna qosymsha psıholog kadrlaryn tartý, olardy daıarlaý júıesin jetildirý máselesin kóterip otyr.

Sondaı-aq, qumar oıyndarǵa táýeldilik, balalardyń quqyqtary máselesin sheshýge arnalǵan zań jobasy daıyndalyp jatyr.

Bizde keıbir balalar úıirmelerge barmaıdy, sport sektsııalarymen qamtylmaǵan. Keıbir ata-analar balasyn bes-alty sektsııaǵa jazyp qoıady. Sonymen qatar, kúni-túni jumysta júrgen ata-analar balasyn sektsııalar men úıirmelerge tirkeı alatynyn da bilmeıdi. Sondyqtan, biz zańnamaǵa tıisti túzetýdi engizdik. Onyń aıasynda úıinde bos júrgen balalardyń úıirmelerge mindetti túrde barýyn qamtamasyz etetin qadamdar eskerilgen. Mundaı batyl áreketter jasaý kerek, sebebi bul balalar úıirmelerge múldem barmaýy múmkin. Sonymen qatar, qıyn jaǵdaıǵa tap bolǵan jetkinshekter men jasóspirimderge psıhologter kómektesýi tıis, - dedi depýtat.

Budan buryn habarlanǵandaı, elimizde bilim berý uıymdaryndaǵy býllıngke qarsy biryńǵaı baǵdarlama ázirlenip jatyr.