Mekteptegi býllıng áreketteriniń aldyn alý sharalary bekitilmek

NUR-SULTAN. QazAqparat – Oqý-aǵartý mınıstrligi mektepterde balalarǵa qatysty jasalatyn býllıng áreketteriniń profılaktıkasyn bekitýdi usyndy, dep habarlaıdy QazAqparat tilshisi.

Jańa erejege sáıkes, balany jábirleý faktileriniń aldyn alý úshin mektepterde arnaıy keńes qurylady. Onyń quramyna dırektordyń tárbıe isi jónindegi orynbasary, áleýmettik pedagog, synyp jetekshisi, psıholog, bilim berý uıymynyń medıtsına qyzmetkeri, ata-analar, kámeletke tolmaǵandar isi jónindegi polıtsııa ınspektory kiredi. Keńes qajetti nusqaýlyqtar men jumys josparyn aıqyndaıdy.

Kez kelgen býllıng áreketi anyqtalǵan jaǵdaıda, jábirlenýshi bala týraly bastapqy aqparat bir kún ishinde jınaqtalyp, ishki ister organdaryna tapsyrylýy tıis. Sonymen qatar, málimetter qosymsha densaýlyq saqtaý uıymdaryna da berilýi kerek. Zańǵa sáıkes, bul quzyrly organdar balaǵa kórsetilgen qatygezdik deńgeıin, densaýlyǵyna keltirilgen zııandylyq dárejesin anyqtaıdy.

Quqyq qorǵaý organdary men densaýlyq saqtaý uıymdarynyń shyǵarǵan uıǵarymy boıynsha, mektep keńesi agressor balanyń ata-anasymen sóılesedi jáne balamen jumys júrgizedi. Áńgimelesý barasynda qatygezdik tanytqan balanyń minez-qulqyna jáne psıhıkalyq jaǵdaıyna taldaý jasalady.

Budan ózge, zábir kórgen oqýshymen de psıholog mamandar jumys júrgizedi. Onyń negizgi maqsaty – balanyń ózine degen senimdiligin qalyptastyrý.

Eger álimjettik kórsetken oqýshy nemese zábir kórgen bala jetim, ata-ana qamqorlyǵynsyz qalǵan bolsa, onda onyń múddesin zańdy ókil qorǵaıdy.

Eske sala keteıik, buǵan deıin kıberbýllıngke qatysty zań jobasynyń avtory Aıdos Sarym áleýmettik jelide álimjettik jasalsa, onda agressordyń messendjeri buǵattalatynyn aıtqan bolatyn.