Mekteptegi ata-analar konferentsııasynda qandaı máseleler kóterildi

ASTANA. QazAqparat - Búgin elimizdiń barlyq mektepterinde «21 ǵasyrdaǵy qazaqstandyq ata-ana: Óz balańa úlgi bol» atty respýblıkalyq ata-analar konferentsııasy ótip jatyr. Osy oraıda Astanadaǵy №84 mektep-lıtseıinde ata-analarǵa birinshi kezekte nazar aýdaratyn máseleler túsindirildi, dep habarlaıdy QazAqparat.

Shara barysynda mektep psıhologtary ata-analarǵa týyndaýy múmkin problemalarǵa qatysty dáris oqydy. Bul rette birinshi taqyryp balanyń aqparattyq qaýipsizdigin qamtamasyz etýge arnalyp, balalardy zııandy aqparattan qorǵaý qadamdaryna negizdeldi.

«Ata-ananyń mindeti - balanyń ınternetti  paıdalanýyn óz baqylaýyna qoıý jáne balanyń ınternet jetkizetin qyzmetter men aqparatty tutyný mádenıetin qalyptastyrý», - deıdi psıhologtar.

Mamandar balanyń kompıýterge áýestenýinen onyń psıhıkalyq jáne tán  saýlyǵy, tulǵalyq damýy men áleýmettenýi úshin qaýipti bola bastaǵan belgilerge toqtaldy. Osy oraıda mektep oqýshysynda oqýda nemese qurdastarymen qarym-qatynasta qıyndyqtar týyndaıtyny, balanyń jelide qansha ýaqyt ótkizetinin ári qandaı saıttarǵa kiretinin ata-anasynan jasyratyny aıtyldy.

«Balalaryńyzdyń ınternette nemen aınalysatynynan habardar bolyńyzdar. Sonymen qatar, jetkinshekterdiń qandaı chattarǵa, toptarǵa, paraqshalarǵa kiretinin jáne kimmen aralasatynyn surap bilińizder. Balańyzǵa belgisiz adamdardan jiberilgen faıldardy ashýǵa bolmaıtynyn túsindirińiz», - dedi mektep muǵalimderi.

Negizinen, kompıýterge er balalar jaqyn turady eken. Zertteýlerge qaraǵanda, ınternetke táýeldi bir qyz balaǵa shaqqanda 10 er baladan keledi. Bul óz kezeginde er balalardyń mekteptegi sátsizdikterdi kóbirek ýaıymdaıtynyn, sondaı-aq qyzdarǵa arnalǵan kompıýter oıyndary áldeqaıda az kezdesetindigimen túsindiriledi.

Psıhologtardyń aıtýynsha, úıde sırek bolatyn jumysbasty ata-ananyń balalary jelide jıi otyrady.

Budan bólek, konferentsııa barysynda pedagogtar otbasylyq qundylyqtardy nyǵaıtýǵa qatysty eń mańyzdy qadamdar jóninde pikirtalas júrgizdi.

Mamandardyń aıtýynsha, balalardyń  beıtanys adamdarmen sóılespeýin, bóten adammen kólikke otyrmaýyn, mektepten shyqqannan keıin qarańǵy mezgilde kóshe kezip júrmeýi sekildi mańyzdy sharttardy jete túsindirý kerek. Ásirese, bul qaǵıdalar tómengi synyp oqýshylary úshin ózekti, sebebi olar kóbirek derbestik alady jáne ony aınalasyna kórsetýge umtylady.