Mekteptegi áskerı-patrıottyq tárbıe páni muǵalimderiniń mártebesin arttyrý kerek - Q. Muǵalov

ASTANA. QazAqparat - Áskerı bólimder janynan áskerı-patrıottyq tárbıe ortalyqtary qurylatyn bolady. Májilis depýtattarynyń osyndaı ortalyqtar qurý týraly bastamasyn Qorǵanys mınıstrligi qoldap otyr.

Bul týraly búgin Parlament Májilisinde QR Qarýly Kúshteri Bas shtabynyń Tárbıe jáne ıdeologııalyq jumystar departamenti bastyǵynyń orynbasary Qaısar Muǵalov málim etti. Eske salaıyq, Májilistiń Áleýmettik-mádenı damý komıtetiniń otyrysynda «Qazaqstan Respýblıkasyndaǵy jastar saıasaty týraly» zań jobasy tanystyrylǵan bolatyn.

«Zań jobasynyń aıasynda depýtattar áskerı bólim janynan ortalyqtar qurýdy usynyp otyr. Qorǵanys mınıstrliginiń basshylyǵymen keńese kele, biz ondaı ortalyqtardyń qurylýyn qoldaýǵa bolady dep oılaımyz. Degenmen, biz bundaı ortalyqtardyń áskerı-patrıottyq tárbıe retinde qurylýyn qalaımyz. ıAǵnı, áskerı bólim janynda qurylatyn ortalyqtar patrıottyq emes, áskerı-patrıottyq bolýy shart. Bul bizdiń maqsatymyz ben múmkindikterimizge jaýap beretin edi», - dedi Q. Muǵalov.

Budan bólek, sóz arasynda Bas shtab ókili bilim berý mekemelerindegi áskerı daıyndyq máselesine de toqtalyp ótti. Onyń sózine qaraǵanda, eńbekaqynyń tómendigine qaraı, mektepterge zapastaǵy ofıtserlerdi tartý múmkindigi bolmaı otyr. «Sonymen qatar, mektepterde qazir áskerı-patrıottyq tárbıege arnalǵan oqý-materıaldyq bazalary, onyń ishinde kitaphanalyq qorlar joq dese de bolady. Dál osyndaı jaǵdaı joǵary oqý oryndaryndaǵy áskerı kafedralarda da oryn alǵan. Sondyqtan da, mektepterdegi áskerı-patrıottyq pánder muǵalimderiniń mártebesin arttyryp, olardy mektep dırektorynyń áskerı-patrıottyq tárbıe jónindegi orynbasaryna deıin kótergen abzal», - dedi Q. Muǵalov.