Mekteptegi álimjettik: 10-synyp oqýshysynan aqsha alǵan jasóspirim qamaýǵa alyndy
ShYMKENT. QazAqparat - Shymkentte 10-synyp oqýshysynan aqsha jınaǵan degen kúdikpen jasóspirim qamaýǵa alyndy. 11-synyp oqýshysyn eki aıǵa ýaqytsha tergeý abaqtysyna jabý týraly sanktsııany Qarataý aýdandyq sotynyń sýdıasy Janat Músiráliqyzy bergen, dep habarlaıdy QazAqparat tilshisi.
Qarataý aýdandyq sotynyń tóraǵasy Ermahan Rahmanberdiniń aıtýynsha, oqýshyny qamaýǵa alýǵa Qaınarbulaq saıajaıyndaǵy №83 mekteptiń 10-synyp oqýshysynyń ákesi Maılybaı Rysbaev jazǵan aryz negiz bolypty.
«Ol aryzynda 2017 jyldyń qazan aıynan bastap 2018 jyldyń aqpan aıy aralyǵynda óziniń №83 mektepte 10-synypta oqıtyn balasy B.J.-dan 11-synyp oqýshysy T.N úsh ret 2 myń teńge, bir ret 3 myń teńge, bir ret 1500 teńge aqsha alǵandyǵy jóninde aryzdanǵan. Zańdy shara qabyldaýdy suranǵan. Sol aryzdyń negizinde sanktsııa berildi», - deıdi aýdandyq sot tóraǵasy.
Qazirgi tańda joǵarǵy synyp oqýshysyna qatysty Qazaqstan Respýblıkasy Qylmystyq Kodeksiniń 194-baby 2-bóliginiń 1,3-tarmaqtarymen is qozǵalǵan. Kúdikti T.N.-ǵa «kúzetpen ustaý» túrindegi bultartpaý sharasyna 2 aı merzimge sanktsııa berildi. Tergeý amaldary júrgizilýde.
Aıta keteıik, bul oqıǵadan bólek 10 aqpanda dál osy mekteptiń 11-synyp oqýshysy úıiniń aýlasynda asylyp qalǵan bolatyn. 16 jastaǵy Ersultan Ahmetovtiń óli denesin aýladaǵy monshanyń artynan anasy taýyp alǵan bolatyn.
Marqumnyń týystary jasóspirimniń ólimine dostaryn kinálady. Óıtkeni, baqılyq bolardan birer kún buryn jasóspirim mektepte ózge balalardyń álimjettik jasap júrgeni jóninde baýyrlaryna aıtqan eken. Al, qaıtys bolǵan kezde onyń qaltasynan ólimine kináli degen birneshe adamnyń aty-jóni jazylǵan qaǵaz tabylǵany belgili.
Qazir bul oqıǵa boıynsha Qarataý aýdandyq polıtsııa bólimi tarapynan qylmystyq is qozǵalyp, tergeý amaldary júrgizilip jatyr. Barlyq aqparat pen fakti tergeýdiń qupııalylyǵyna baılanysty jarııalanbaýda.
