Mekteptegi aqsha jınaý oqıǵasyna departament túsinik berdi

ALMATY. QazAqparat – Almaty mektebinde jalıýzıge aqsha jınalǵany týraly muǵalimniń janaıqaıyna qatysty QR Sybaılas jemqorlyqqa qarsy is-qımyl agenttiginiń Almaty qalasy boıynsha departamenti túsinik berdi, dep habarlaıdy QazAqparat tilshisi.

№143 mektep lıtseıindegi aqsha jınaý deregi boıynsha qazir departamenttiń arnaıy monıtorıng toby jumys isteýde.

«Áleýmettik jelide jarııalanǵan jazbany arnaıy baqylaý toby tekserýde. Top músheleri quqyqbuzýshylyq deregi bolǵanyn rastaıdy. Biz mektepke baryp túsindirý jumystaryn júrgizdik. Bilim basqarmasymen de sóılesip jatyrmyz. Biraq, Lázzat Musanova bizge áli aryz jazǵan joq», - dedi QR Sybaılas jemqorlyqqa qarsy is-qımyl agenttiginiń Almaty qalasy boıynsha departamenti.

Aıta ketý kerek, №143 mektep-lıtseıiniń orys tili pániniń muǵalimi Lázzat Musanovanyń Facebook-tegi jazbasy áleýmettik jelide shý týǵyzdy.

Pedagog kabınetke jalıýzı alý úshin balalar men muǵalimder aqsha jınap bergenin aıtyp dabyl qaqty.

Keıin Almaty óńirlik kommýnıkatsııalar qyzmetinde bul derek boıynsha tekserý júrgizilip jatqanyn málimdedi.