Mekteptegi tóbeles adam ólimine ákep soqty: 9-synyp oqýshysy 6 jylǵa sottaldy

ASTANA. KAZINFORM — Jambyl oblysynda mektep oqýshylary arasyndaǵy janjal adam ólimimen aıaqtalǵan is boıynsha úkim shyqty.

Jambyl oblysynyń kámeletke tolmaǵandardyń isteri jónindegi mamandandyrylǵan aýdanaralyq soty abaısyzda jábirlenýshiniń ólimine ákep soqqan, densaýlyǵyna qasaqana aýyr zııan keltirdi dep aıyptalǵan kámeletke tolmaǵan R.-ǵa qatysty qylmystyq isti qarady.

Kámeletke tolmaǵan sottalýshy R., 9-synyp oqýshysy, Taraz qalasyndaǵy mektep ǵımaratynda bolǵan kezde, óziniń kámeletke tolmaǵan qurdasy A.-men qaqtyǵys kezinde oǵan zorlyq-zombylyq kórsetken. Moıyn jaraqatynyń saldarynan jábirlenýshi oqıǵa ornynda kóz jumdy. Sottalýshynyń kinási kýálerdiń aıǵaqtarymen, saraptamalardyń qorytyndylarymen jáne zattaı dáleldemelermen dáleldendi.

Sot jaza taǵaıyndaý barysynda sottalýshynyń kámeletke tolmaǵan jasyn, kináni ishinara moıyndaýyn jáne oń qyrynan sıpattalýyn jazany jeńildetetin mán-jaılar retinde qarastyrdy. Aýyrlatatyn mán-jaılar anyqtalmady.

— Sot úkimimen sottalýshy R. QK 106-babynyń 3-bóligi boıynsha kináli dep tanylyp, oǵan QK 81-babynyń 7-bóligi jáne QK 55-baby 2-bóliginiń 2) tarmaǵy negizinde 6 jyl 8 aı merzimge bas bostandyǵynan aıyrý jazasy taǵaıyndaldy. Sondaı-aq sot sottalýshynyń zańdy ókilderinen jábirlenýshi taraptyń paıdasyna 10 mln teńge mólsherinde moraldyq zııan óndirip aldy. Úkim zańdy kúshine engen joq, — delingen sot taratqan aqparatta.

Osyǵan deıin Jambyl oblysynda jasóspirim mert bolǵany anyqtaldy. Fýtbol matchynan keıin jeńilgenin moıyndamaǵan úsh joǵary synyp oqýshysy dúken artynda kishi synyp oqýshylaryn jınap, olardy aıaýsyz soqqyǵa jyqqan.

Sonymen qatar, Tarazda 14 jastaǵy mektep oqýshysy ózine qol jumsaǵanyn jazǵan edik.