Mekteptegi tamaqtandyrý: Ákimshilik jaýapkershilik enýi múmkin
ASTANA. KAZINFORM – Oqý-aǵartý mınıstrligi mektepte tamaqtandyrý qyzmetterin satyp alý kezinde ónim berýshilerdi irikteý talaptaryn buzǵany úshin laýazymdy tulǵalarǵa ákimshilik jaýapkershilik engizý máselesin pysyqtaýda. Bul týraly sala mınıstri Ǵanı Beısembaev aıtty.
Qyrkúıek-qazan aılarynda elimizdegi mektep ashanalarynyń sanıtarııalyq epıdemıologııalyq talaptarǵa sáıkestigine monıtorıng júrgizilgen.
«Respýblıkalyq monıtorıng qorytyndysy mekteptegi tamaqtandyrý sapasyna qatysty atqarýshy organdar baqylaýynyń áli de jetkiliksizdigin kórsetip otyr, bul zańnama talaptarynyń buzylý faktilerinen de baıqalyp otyr. Dálirek aıtqanda, monıtorıng barysynda 771 buzýshylyq anyqtalǵanyn atap ótkim keledi», - dedi mınıstr búgingi Úkimet otyrysynda.
Sondaı-aq, mınıstrlik mektepte tamaqtandyrýdy uıymdastyrý boıynsha jergilikti atqarýshy organdardyń jumysyna keshendi baǵalaý júrgizgen. Baǵalaý kezinde tamaqtandyrý sapasyna júrgizilgen monıtorıng nátıjeleri, ashanalardyń qajetti materıaldyq-tehnıkalyq jabdyqtalýy, 1 oqýshyǵa shaqqandaǵy óńirlerdegi tamaqtaný quny, ata-analar arasynda júrgizilgen saýalnama nátıjeleri eskerildi.
«Máselen, Jambyl, Mańǵystaý, Almaty, Atyraý oblystarynyń jáne Shymkent qalasy ákimdikteriniń tarapynan mektepterde sapaly tamaqtanýdy uıymdastyrýǵa tıisti kóńil bólinbeı otyrǵany anyqtaldy. Bul atalǵan óńirlerdegi ákimdikterdiń tamaqtandyrý sapasyna erekshe nazar aýdaryp, baqylaýdy kúsheıtý qajettigin kórsetedi. Qazirgi kúni mınıstrlik mektepte tamaqtandyrý qyzmetterin satyp alý kezinde ónim berýshilerdi irikteý talaptaryn buzǵany úshin laýazymdy tulǵalarǵa ákimshilik jaýapkershilik engizý máselesin pysyqtaýda», - dedi Oqý-aǵartý mınıstri.
Buǵan deıin Memleket basshysy Qasym-Jomart Toqaev aýyl sharýashylyǵy qyzmetkerleriniń birinshi forýmynda mektep ashanasyndaǵy tamaq sapasyn arttyrý baǵytyndaǵy ustanymdaryn aıtqan edi.
El mektepterinde 1,7 mln bala tegin ystyq tamaqpen qamtylǵan.
