Mekteptegi taǵamnan zııandy ónimder alynyp tastalmaq
ASTANA. KAZINFORM – Qazaqstanda 2025 jyldyń 1 qyrkúıeginen bastap bilim berý uıymdarynda oqýshylardy tamaqtandyrýdyń jańa standarty qoldanysqa engizildi. Bul týraly QR DCM Sanıtarııalyq-epıdemıologııalyq baqylaý komıteti tóraǵasynyń orynbasary Nurqan Sádýaqasov málimdedi.
– 2023 jyldan bastap memleket bastaýysh synyp oqýshylaryn jáne memlekettik ataýly áleýmettik kómek alýǵa quqyǵy bar jekelegen sanattaǵy balalardy tegin ystyq tamaqpen qamtamasyz etip keledi. Alaıda júrgizilgen taldaý nátıjesi mektep oqýshylarynyń tamaqtanýynda tuz, qant jáne maıdyń mólsheri tym joǵary ekenin kórsetti. Sonymen birge ratsıonda kókónister, jemis-jıdekter men sút ónimderi jetkiliksiz, – dedi Sádýaqasov.
Onyń aıtýynsha, osyndaı tamaqtaný balalar arasynda semizdikke, qant dıabetine jáne júrek-qan tamyrlary aýrýlarynyń erte jastan damýyna ákelýi múmkin.
– Jańa standart balabaqshalar, mektepter, kolledjder men saýyqtyrý lagerlerin qosa alǵanda, barlyq bilim berý uıymdaryna taralady, – dedi komıtet ókili.
Jańa tamaqtaný standarty zamanaýı halyqaralyq tásilderge negizdelip ázirlengen.
– Atalǵan standart qazirgi zamanǵy halyqaralyq tásilderge negizdelip jasaldy. Atap aıtqanda, ol QR Densaýlyq saqtaý mınıstrligi, QR Oqý-aǵartý mınıstrligi, Qazaq taǵamtaný akademııasy, ıÝNISEF jáne Dúnıejúzilik densaýlyq saqtaý uıymy (DDSU) sekildi halyqaralyq uıymdarmen yntymaqtastyqta ázirlendi, – dedi ol.
Sádýaqasovtyń aıtýynsha, jańa standart aıasynda oqýshylardy tamaqtandyrý júıesinde birneshe mańyzdy ózgerister engiziledi.
– Qant mólsheri DDSU usynymdaryna saı 3,6 esege, al tuz mólsheri 5 esege azaıtylady. Sonymen qatar oqýshylar ratsıonynda kókónister, jemister jáne sút ónimderiniń úlesi artady. As mázirinen shujyq ónimderi, qaqtalǵan taǵamdar, spredter jáne tuz ben qant mólsheri joǵary ózge de ónimder tolyqtaı alynyp tastalady. Gazdalǵan tátti sýsyndardyń ornyna balalarǵa sý, sút, qyshqyl sút ónimderi, qant mólsheri tómen jemis shaılary men kompottar usynylady, – dedi vedomstvo ókili.
Buǵan qosa, jańa Standartta alǵash ret shaǵyn jınaqty mektepterdegi tamaqtanýdy uıymdastyrý talaptary men arnaıy dıetalyq qajettilikteri bar balalardy tamaqpen qamtamasyz etý erejeleri engizildi.
– Alǵash ret «Jeýge jaramsyzdyq ındeksi» atty uǵym qoldanysqa engizilip otyr. Bul – usynylǵan taǵam qaldyqtarynyń sandyq kórsetkishi. Atalǵan kórsetkish arqyly balalardyń berilgen tamaqqa qanshalyqty qanaǵattanatyny jáne mekteptegi tamaqtaný júıesiniń tıimdiligi baǵalanady, – dep naqtylady Nurqan Sádýaqasov.
Buǵan deıin bilim berý uıymdaryndaǵy tamaqtaný nysandaryn baqylaý tásili ózgeretinin jazǵanbyz.