Mekteptegi smartfon máselesi: jańa oqý jylynda jalpy ereje engiziledi
ASTANA. KAZINFORM — Mınıstrlik mekteptegi sabaq barysynda smartfondy paıdalanýǵa qatysty naqty normatıvti engizedi. Bul týraly Úkimet otyrysynda QR Oqý-aǵartý mınıstri Juldyz Súleımenova málim etti.
- Qazir Senatta tıisti zań qaralyp jatyr. Atalǵan qujat aıasynda Oqý-aǵartý mınıstrligi ortaq ustanymdy ereje arqyly bekitetin bolady. Buǵan deıin árbir mektepte, ár synypta nemese árbir muǵalimniń óziniń ustanymyna sáıkes, smartfondy paıdalaný tártibi mektepte jekeshe sheshiletin. Keıbir joǵary synyptarda ınternet resýrstardy paıdalaný úshin ruqsat alatyn.
Sondyqtan smartfondar boıynsha ortaq ustanym bolmaǵany ras, - dedi J. Súleımenova Úkimet otyrysynan keıingi brıfıngide.
Osy oraıda ol 2026-2027 jańa oqý jylyna mınıstrlik naqty ortaq ustanymdy engizetinin atap ótti.
- Qazir bul salany zerdelep jatyrmyz. Toǵyzynshy synypqa deıin balalardyń «ekrandy qaraý ýaqyty» degen álemdik normatıv bar. Sol normatıvti negizge almaqpyz. Ekinshiden, 10-11 synypta resýrstardyń birazy smartfonǵa tikeleı baılanysty. Osy oraıda ony paıdalaný ýaqytyn qarastyramyz. Al birinshiden toǵyzynshy synypqa deıin tek qana sabaq barysynda smartfondy paıdalanýǵa qatysty naqty normatıvti engizemiz, - dedi mınıstr.
Vedomstvo basshysy tolyq shekteý bolmaıtynyn, sebebi balanyń qoǵamdyq jerdegi qaýipsizdigi men ata-anasymen baılanysy úshin smartfon kerek ekenin atap ótti.
- Eń bastysy, sabaq kezinde paıdalanýdyń erejesin engizýimiz kerek, - dedi Juldyz Súleımenova.
Aıta keteıik, balalarǵa áleýmettik jelilerge tyıym salatyn normalar Quryltaıda qaralady.
Budan buryn habarlanǵandaı, Parlament Májilisinde qaralǵan zań jobasy aıasynda Oqý-aǵartý mınıstrligi mektepterdegi smartfondy paıdalaný tártibin aıqyndaıdy.
