Mekteptegi quqyqbuzýshylyq: Bilim basqarmasynyń basshysy býllıngtiń sıpaty men saldaryn túsindirdi

ASTANA. KAZINFORM – AIMAQ podkastynyń jańa shyǵarylymynda Astana qalasy Bilim basqarmasynyń basshysy Qasymhan Senǵazyev mekteptegi quqyqbuzýshylyq qandaı jaǵdaıda býllıng sanalatynyn jáne onymen kúres qalaı júrgiziletinin málimdedi.

Qasymhan Senǵazyev
Foto: vıdeodan alynǵan skrın

Onyń sózinshe, býllıng degenimiz – balany qatarlastary udaıy túrtpektep, únemi tıisip, úzdiksiz qoqan-loqy jasaýy.

– 111 nómirine ata-analar men balalardan qońyraý, shaǵym kóp túsedi. Biraq sol faktilerdi zertteı kele, jartysynan kóbi býllıng emes ekeni anyqtalady. Sebebi balalardyń birin-biri bir ret ıterip qalýy, mazaqtaýy ne bir ret sózben áldene dep tıisýi – býllıng emes. Býllıng – kún saıyn nemese júıeli túrde qoqan-loqy kórsetý, – dep túsindirdi maman.

Áıtse de, býllıngti mektep oqýshylary arasynda múlde joq dep te aıtýǵa bolmaıdy. Bala bolǵan soń, ondaı faktiler kezdesedi. Ásirese, ótpeli kezeńdegi jasóspirimder, 6-7 synyp oqýshylary arasynda jıi tirkeledi.

Sonymen birge, Qasymhan Senǵazyevtiń aıtýynsha, býllıngke ushyraǵan jáne býllıng jasaǵan balalar men olardyń ata-analaryna pedagogıkalyq súıemeldeý jumystary júrgiziledi. Sol arqyly máseleni sheshý amaldary jasalady.

– Qazir burynǵydaı mektepte tirkeýge alý degen joq. Tirkeýge alý tek qalalyq polıtsııada bar. Qylmys jasaǵan balalar sottyń sheshimimen qalalyq polıtsııanyń tirkeýine alynady. Qazir shaharda ondaı tizimde 125 bala bar. Olarmen jeke jumys isteledi. Al álgindeı tirkeýge enbeý úshin mektepte balamen pedagogıkalyq súıemeldeý, psıhologııalyq qoldaý jumystary júrgizilip, býllıng saldarynan shyǵarý kerek, – dedi Astana qalasy Bilim basqarmasynyń basshysy.

Aıta keteıik, buǵan deıin balalardyń býllıng pen sýıtsıdtik nıetin anyqtaıtyn júıe ázirlengenin jazǵanbyz.