Mekteptegi keıbir pánder biriktirilse, muǵalimder jumyssyz qalmaı ma – mınıstr jaýaby

ASTANA. KAZINFORM – Úkimet otyrysynan keıingi brıfıngte Oqý-aǵartý mınıstri Ǵanı Beısembaev mektepterde keıbir pánderdi biriktirip oqytýǵa qatysty pikir bildirdi.

– Kóterilgen másele pılottyq joba retinde josparlanyp otyrǵany belgili. Usynys boıynsha algebra men geometrııany biriktirý máselesi kóterilgen. Bul jappaı aýqymdy túrde engizilmeıdi. Álemde bar úrdis. Jalpy pánaralyq baılanys, pánderdiń biriktirilip oqytylýy burynnan bar dúnıe. Sondyqtan qazir áriptesterimizdiń usynysy boıynsha pılottyq deńgeıdi josparlap otyrmyz. Eger nátıje beretin bolsa ary qaraı jalǵasady. Al eger durys bolmasa burynǵydaı qala beredi. Sol úshin mektepterdiń tańdaýyna beriledi, - dedi mınıstr BAQ ókilderiniń saýalyna oraı.

Onyń atap ótýinshe, pılottyq joba barlyq 20 óńirdegi belgili bir mektepterde ǵana engiziledi. 

– Mektepterdiń tizimi anyqtalǵannan keıin jarııalanady. Árbir mektep soǵan oraı oqý josparyn aıqyndaıdy. Muǵalimder jumyssyz qalmaıdy. Bul mindeti túrde jan-jaqty talqylanyp qabyldanatyn dúnıe, - dedi Ǵanı Beısembaev. 

Aıta keteıik, jyl sońyna deıin «Qazaqstan balalary» biryńǵaı baǵdarlamasy qabyldanady.