Mekteptegi býllıng: Oralda birneshe pedagog pen ata-analar jaýapqa tartyldy
Oral qalasynda oqýshynyń býllıngke ushyraý faktisi boıynsha birneshe ata-ana jáne muǵalimder jaýapqa tartyldy, dep habarlaıdy Kazinform.
Mektep oqýshysynyń ekinshisine ses kórsetip, betinen urǵany túsirilgen vıdeo áleýmettik jelide tarady.
BQO Bilim basqarmasynyń baspasóz qyzmeti álimjettik oqıǵasy 13 qarasha kúni saǵat 07.50-de Zachagan kentindegi №38 mektep-lıtseıiniń ekinshi qabatynda ornalasqan dene shynyqtyrý bólmesindegi ájethanada bolǵanyn málim etti.
«Oral qalalyq bilim berý bóliminiń aqparatyna sáıkes, jábirlengen oqýshynyń ata-anasy 6 jeltoqsan kúni mektep ákimshiligine oryn alǵan jaǵdaıdy habarlap, shara qoldanýdy suraǵan. Sol kúni mektep ákimshiligi jáne Shaǵan polıtsııa bóliminiń qyzmetkeri synyp oqýshylarymen jáne ata-analarmen mán-jaıdy anyqtaý úshin jınalys uıymdastyryp, túsinik jumystaryn júrgizdi. Mektep ákimshiligi oqýshylar arasynda quqyq buzýshylyqqa jol bergeni úshin synyp jetekshilerine tártiptik shara qoldandy. Oral qalalyq bilim berý bólimi komıssııa quryp, 8 jeltoqsanda №38 mektep-lıtseıinde tekserý júrgiziledi. Jaǵdaı baqylaýǵa alyndy», – delingen resmı habarlamada.
Al BQO Polıtsııa departamentiniń baspasóz qyzmeti usynǵan aqparatqa súıensek, kúsh kórsetken balalardyń ata-analary jaýapqa tartyldy.
«6 jeltoqsan kúni Shaǵan polıtsııa bóliminiń kámeletke tolmaǵandar isteri jónindegi ınspektorlary atalǵan mektepte tekserý júrgizdi. Sonyń barysynda 15 jastaǵy 9-synyp oqýshysynyń 8-synypta oqıtyn 13 jasar balanyń betinen shapalaqpen urǵany anyqtaldy. Atalǵan derek Shaǵan polıtsııa bóliminde tirkeldi.
Tekserý nátıjesinde 9-synyp oqýshysynyń ata-anasyna qatysty QR Ákimshilik quqyqbuzýshylyq týraly kodeksiniń 435-babyna sáıkes ákimshilik hattama toltyryldy.
Al vıdeoǵa túsirip turǵan 2010 jyly týǵan oqýshynyń ata-anasyna qatysty atalǵan kodekstiń 127-babyna sáıkes ákimshilik hattama toltyryldy. Oqýshylarmen jáne olardyń ata-analarymen túsindirý jumystary júrgizildi», – dep habarlady vedomstvodan.
Álimjettik kórgen balanyń ákesi Jánibek Tólepbergenovtiń aıtýynsha, balasynyń býllıngke ushyrap júrgenin Instagram-da jarııalanǵan vıdeodan bilgen.
