Mektepte jynystyq tárbıe týraly pán engizý kerek pe – mınıstr jaýaby

ASTANA. KAZINFORM – Oqý-aǵartý mınıstri Ǵanı Beısembaev mektep baǵdarlamasyna jynystyq qatynas tárbıesin engizýge qatysty pikir bildirdi.

Úkimet otyrysynan keıin ótken baspasóz máslıhatynda vedomstvo basshysyna «Mektepte jynystyq tárbıe beretin pán engizý kerek pe?» degen saýal qoıyldy.

- Meniń oıymsha, eń aldymen ata-analardyń jaýapkershiligin arttyrý durys bolady, óıtkeni bul árdaıym solaı bolǵan, ıaǵnı otbasynda tárbıelengen. Sol sebepti biz arnaıy ata-analardy pedagogıkalyq qoldaý ortalyqtaryn ashtyq. Men psıhologtarǵa sol jerde ata-analardy balalarmen qalaı qarym-qatynas jasaý kerek, balalardy qalaı tárbıeleý kerek degen máseleler boıynsha barynsha aǵartý jumystaryn júrgizsin dep tapsyrma berdim, - dep jaýap berdi Ǵanı Beısembaev.

Osylaısha, mınıstr jalpy tárbıemen qatar jynystyq qatynasqa qatysty tárbıeni de bala ata-anadan alýy tıis dep esepteıdi.

- Árıne, mektep te bul jaýapkershilikten qashpaıdy, biraq búkil jaýapkershilikti tek mektepke artý durys emes dep oılaımyn. Mektep bul jaýapkershilikten bas tartyp jatqan joq. Biz «Birtutas tárbıe» baǵdarlamasy aıasynda tıisti is-sharalar ótkizip jatyrmyz, biraq tikeleı jynystyq qatynas máselesi emes. Bul tárbıe, eń aldymen, ata-analar tarapynan júrgizilýi tıis. Sondyqtan, ata-analar osy ispen aınalyssa, bul óte jaqsy bolady dep sanaımyn. Biz bul baǵytta qoldaý kórsetemiz,- dep tolyqtyrdy vedomstvo basshysy.

Mınıstrdiń málimdeýinshe, jaqyn arada mektepterde jynystyq qatynas taqyrybyn qozǵaıtyn pán nemese sabaq oqytylmaıdy.

Aıta keteıik, Úkimet basshysy mektep bitirý keshinde balalardyń qaýipsizdigine erekshe nazar aýdarý qajettigin aıtty.