Áleýmettik ámııan: Balalar mektepte jeńildikpen tamaqtanyp, tegin dári-dármek alady
ASTANA. KAZINFORM — Bıylǵy 1 qyrkúıekten bastap elimizdiń barlyq óńirinde «Áleýmettik ámııan» sheńberinde oqýshylardy tegin jáne jeńildikpen tamaqtandyrý boıynsha jobany keńinen taratý bastalady.
Joba qazaqstandyqtarǵa kórsetiletin memlekettik qoldaý sharalarynyń qoljetimdiligi men ashyqtyǵyn qamtamasyz etýge baǵyttalǵan.
Pılottyq rejımde 2023 jyldyń sońynan beri elimizde azamattardyń jekelegen sanattaryn dári-dármekpen qamtamasyz etý, mektepterde tegin jáne jeńildikpen tamaqtandyrý sııaqty qyzmetter iske asyrylýda.
Dári-dármekpen qamtamasyz etý boıynsha 43 uıym qosyldy, 30 myń retsept iske asyryldy; mektepte tegin jáne jeńildikpen tamaqtandyrýǵa — 93 uıymǵa 27 myń túski as taratyldy.
«Áleýmettik ámııandy» ázirleýshiler atalǵan pılottyq jobanyń sátti tájirıbesin taratýǵa nıetti.
«Áleýmettik ámııan» azamattardyń EGOV qosymshasynda memleket tarapynan kórsetiletin barlyq qoldaý quraldary men sharalaryn jınaqtaý arqyly azamattarǵa memlekettik qoldaý sharalaryn alýdy jeńildetý úshin jasalǵan. Atalǵan joba arqyly memlekettik kómek alý jáne onyń júrgizilý tarıhyn qadaǵalaý yńǵaıly. Vaýcherler jekelendirilgen túrde jazylady, bul kez kelgen zańsyz tirkeýlerdiń múmkindigin shekteıdi. Jyl sońyna deıin atalǵan ónim elimizdiń barlyq azamattaryna ystyq tamaq pen dári-dármek boıynsha qoljetimdi bolady dep josparlanyp otyr», — dedi BTS Digital JShS bas dırektory Nurtaı Ábilǵalıev.
Budan basqa, «Áleýmettik ámııan» sheńberinde aqshalaı qarajatty monetızatsııalaý, múgedektigi bar adamdar úshin tehnıkalyq ońaltý quraldaryn satyp alý; halyqtyń áleýmettik osal toptaryna ÁMAT tizbesinen azyq-túlik satyp alýda ataýly kómek kórsetý; áleýmettik osal sanattaǵy tutynýshylar úshin taýarly gazǵa vaýcherler men JJM baǵasynyń ósýin óteý úshin vaýcherler usyný boıynsha pılottyq jobany iske qosý qosymsha pysyqtalyp jatyr.
