Mektepte jaralanǵan oqýshy: dırektor men orynbasarlary qatań sógis aldy
AQTÓBE. QazAqparat - Aqtóbede oqýshy mektepte jaralanyp, dırektor men onyń orynbasarlaryna qatań sógis jarııalandy, dep habarlaıdy QazAqparat tilshisi.
Aqtóbedegi Bestamaq orta mektebinde mektepaldy daıarlyq tobynda oqyp júrgen 6 jasar Ibrahım jaralanyp, ata-anasy áleýmettik jeli arqyly kómek suraǵan bolatyn. Dárigerler balany qaıta qarap, Alǵa aýdandyq aýrýhanasyna jatqyzdy.
«Aqtóbe oblystyq bilim basqarmasy qazir bolǵan oqıǵaǵa baılanysty tekserýdi bastady. Ibrahım Taılanovtyń mektepte jaralanǵany belgili boldy. Qazir oqýshy aýrýhanada em qabyldap jatyr. Dırektordyń oqý isi jáne sharýashylyq jónindegi orynbasarlary men tárbıeshige qatań sógis berildi. Alǵa aýdandyq bilim bólimi Bestamaq orta mektebiniń dırektoryna qatań sógis jarııalady», - dep habarlady oblystyq bilim basqarmasy.
