Mektepte uıaly telefonǵa tyıym salý oqýshylarǵa qalaı áser etedi — zertteý nátıjesi
ASTANA. KAZINFORM – Sońǵy bir jyl ishinde birqatar el mektepterde smartfon qoldanýǵa shekteý engizdi. Ýaqyt óte kele zertteýshiler jańa ereje balalardyń tártibin jaqsartýǵa, zeıinin arttyrýǵa jáne býllıng deńgeıin tómendetýge kómekteskenin anyqtaǵan.
Mundaı qorytyndyǵa Stenford, Dıýk, Mıchıgan jáne Pensılvanııa ýnıversıtetteriniń zertteýshileri kelip otyr. Olar AQSh-taǵy shamamen 4,6 myń mekteptiń derekterin taldaǵan. Zertteý AQSh-tyń Ulttyq ekonomıkalyq zertteýler bıýrosynda uıymynda jarııalandy.
Zertteý nátıjesine sáıkes, telefon qoldanýǵa qoıylǵan qatań shekteýler oqýshylardyń oqý kúni kezinde smartfonda ótkizetin ýaqytyn aıtarlyqtaı qysqartqan. Sonymen qatar muǵalimderdiń gadjetterge qatysty mektep saıasatyna qanaǵattaný deńgeıi artqan.
Zertteý avtorlary shekteý engizilgennen keıin mektepterge beıimdelý kezeńinen ótýge týra kelgenin atap ótedi. Alaıda ýaqyt óte kele oqýshylardyń kóńil kúıi jaqsaryp, tártipke qatysty máseleler birtindep azaıǵan.
Bul rette zertteý test nátıjelerine aıtarlyqtaı áser etpegenin kórsetken. Degenmen kórsetkishter oqýshylardyń jasyna qaraı ártúrli bolǵan. Soǵan qaramastan zertteýshiler smartfonǵa tyıym salý tsıfrlyq alańdatýshy faktorlardy edáýir azaıtyp, oqýshylardyń minez-qulqyna aıqyn ózgeris ákelgen degen qorytyndyǵa kelgen.
Fınlıandııanyń Yle teleradıo kompanııasynyń málimetinshe, osyndaı ózgerister Fınlıandııada da baıqalyp otyr. Ótken jyly bul elde mektepterge oqý kúni kezinde smartfon qoldanýdy shekteýge nemese tolyqtaı tyıym salýǵa ruqsat berilgen.
Aıtalyq, Tampera qalasyndaǵy mektepterdiń birinde telefondardy úzilis kezinde de ǵımarat ishinde qoldanýǵa tyıym salynǵan. Oqýshylardyń aıtýynsha, osydan keıin olar bir-birimen jıi aralasyp, ústel oıyndaryn oınap, sportpen shuǵyldanǵan jáne áleýmettik jelilerdi qaraýdyń ornyna sabaqqa daıyndala bastaǵan.
Saýalnamaǵa qatysqan mektep dırektorlary da oqýshylardyń ózara qarym-qatynasy artqanyn, jalǵyzdyqta az ýaqyt ótkizetinin jáne synyp ómirine belsendirek qatysa bastaǵanyn aıtqan. Sonymen qatar muǵalimder áleýmettik jeliler men jasyryn túsirilim arqyly jasalatyn býllıng jaǵdaılarynyń azaıǵanyn atap ótken.
Osyǵan uqsas qorytyndyny Kanada zertteýshileri de jasaǵan. 2026 jylǵy kanadalyq balalar men jasóspirimderdiń densaýlyǵyna júrgizilgen saýalnama derekterine negizdelgen zertteý ekran aldynda ótkizetin ýaqyt boıynsha usynystardy saqtaıtyn jasóspirimderdiń psıhologııalyq jaǵdaıy jaqsyraq bolatynyn, kúızelis deńgeıi tómen ári oqý úlgerimi joǵary ekenin kórsetken.
Sondaı-aq zertteý ekran aldynda az ýaqyt ótkizetin jasóspirimderdiń uıqy máselelerine, bas aýrýyna jáne sýıtsıdtik oılarǵa sırek shaǵymdanatynyn anyqtaǵan.
Materıaldyń aǵylshyn tilindegi túpnusqasyn myna siltemege ótý arqyly oqı alasyzdar.
Buǵan deıin Oqý-aǵartý mınıstrligine mektepterde smartfondardy paıdalanýǵa tolyq tyıym salý quzyreti beriletinin jazǵan edik.
