Mektepte uldardyń, al joǵary oqý oryndarynda bilim alatyn qyzdardyń sany basym
ASTANA. 31 naýryz. QazAqparat -2011/12 oqý jylynyń basynda kúndizgi jalpy bilim beretin mektepterde 2 mln. 522,8 myń adam bilim alsa, onyń ishinde uldardyń úles salmaǵy 50,6 paıyzdy, al qyzdar 58 paıyzdy quraıdy.
Bul týraly QR Statıstıka agenttiginen habarlandy.
«Qoǵamda genderlik teńdik jáne áıelder men erlerdiń teń quqyqtaryn iske asyrýynda bilim mańyzdy oryn alady. 2009 jylǵy Ulttyq sanaǵynyń qorytyndysy boıynsha áıelder men erlerdiń saýattylyq deńgeıiniń mánderi birdeı jáne shamamen 100 paıyz quraıdy. Sanaqaralyq kezeńde (1999-2009 jj.) halyqtyń bilim deńgeıi birshama ulǵaıdy: ǵylym doktorlary jáne ǵylym kandıdattarynyń sany tıisinshe 2 ese jáne 1,7 esege artty, (áıelder úlesi - 38,2 paıyz jáne 51,9 paıyz), 1,7 myń adamnyń PhD doktory ǵylymı dárejesi bar, onyń ishinde 53,5 paıyzdy áıelder quraıdy», - delingen baspasóz aıǵaǵynda.
Sonymen qatar, agenttik málimetterine qaraǵanda, 2011/12 oqý jylynyń basynda kúndizgi jalpy bilim beretin mektepterde 2 mln. 522,8 myń adam bilim alsa, onyń ishinde uldar jáne qyzdardyń úles salmaǵy tıisinshe 50,6 paıyz jáne 49,4 paıyzdy quraǵan.
Budan bólek, jyl saıyn tehnıkalyq jáne kásiptik bilim beretin uıymdarda oqıtyndardyń kontıngenti ósýde jáne 2011/12 oqý jylynda oqıtyndar sany 601,8 myń adam qurady. Bunyń ishinde 280,7 myń adam nemese 46,6 paıyzy - qyzdar. Kóbinese qyzdar «Qyzmet kórsetý, ekonomıka, basqarý» - 24,5 paıyz (jalpy sanynan), «Bilim» (20 paıyz) jáne «Medıtsına, farmatsevtıka» (16,4 paıyz) mamandyqtary boıynsha oqýda. Jigitter kóbinese «Óndiris, qurastyrý, kólikti paıdalaný jáne jóndeý» - 14,1 paıyz (jalpy sanynan), «Baılanys, telekommýnıkatsııalar jáne aqparattyq tehnologııalar» (12,9 paıyz) sııaqty mamandyqtardy tańdaıdy.
Sonymen qatar, Statıstıka agenttiginiń málimetteri boıynsha 2011/12 oqý jylynyń basynda respýblıkanyń joǵary oqý oryndarynda 629,5 myń adam oqydy. Onyń ishinde 366,5 myń adam nemese 58 paıyzyn qyzdar quraıdy. Memlekettik oqý granttary boıynsha 134,0 myń stýdent bilim alýda, onyń ishinde 83,8 myń adam nemese 63 paıyzdy qyzdar quraıdy. Stýdent-qyzdardyń kópshiligi «Áleýmettik ǵylymdar, ekonomıka jáne bıznes» - 22 paıyz (jalpy sanynan), al stýdent-jigitter (25,8 paıyzy) «Tehnıkalyq ǵylymdar jáne tehnologııalar» mamandyqtar tobyn tańdaıdy.
2011 jyly magıstranttar sany 21 myń adamdy qurady, onyń ishinde 65,4 paıyzy - áıelder. Doktorantýralarda 1,3 myń adam oqıdy, onyń ishinde 59 paıyzy - áıelder. Doktorantýrada oqıtyndar sany boıynsha kóbinese áleýmettik ǵylymdar, ekonomıka jáne bıznes (26,6 paıyz), tehnıkalyq ǵylymdar jáne tehnologııalar (22,2 paıyz), jaratylystaný ǵylymdary (14,1 paıyz), mamandyqtarynyń jartysynan kóp bóligin áıelder (55-59 paıyz) quraıdy.
