Mektepte test úshin aqsha jınaý zańsyz - Sybaılas jemqorlyq agenttigi
«Biz ulttyq biryńǵaı testileýge daıyndyq sharalary jaıynda aıtyp otyrǵan joqpyz. Ondaı testilerdi 10-11 synyptarda ótkizedi. Alaıda, búginde keıbir daıyndyq testilerin 9-shy synyptan, tipti 4-shi synyptan bastap uıymdastyryp jatady. Sol úshin aqsha jınaıdy. Biz kimniń jáne qalaı aqsha jınaıtynyn bilemiz. Biraq aldyn ala eskertý jasap otyrmyz. Ondaı kásip - zańsyz. Aqsha jınaý tyıylmasa, tıisti sharalardy qolǵa alamyz» , - deıdi QR Memlekettik qyzmet isteri jáne sybaılas jemqorlyqqa qarsy kúres agenttiginiń departament basshysy Danııar Sabyrbaev.
Onyń aıtýynsha, búginde daıyndyq testilerin jeke menshik kompanııalar ótkizip otyrady. Al árbir oqýshy bir test úshin 500 teńgege deıin aqsha tóleýge mindetti.
«Máselen, Almaty oblysynda 9-11 synyptar úshin testileý uıymdastyryldy. Árbir testiniń baǵasy 300-500 teńge shamasynda boldy. Ony keıbir mektepter aptasyna bir ret, keıbireýi aıyna bir márte tapsyrdy. Bir qyzyǵy, ata-analar synaqty bilim jáne ǵylym mınıstrligi ótkizip jatyr dep oılaıdy. Olaı emes. Ondaı testiler úshin aqsha jınaǵan zańsyz», - dep atap kórsetti D.Sabyrbaev.