Mektepte oryssha sabaq beretin ustazdar tapshy

ASTANA. QazAqparat – Talapkerler pedagogıkalyq joǵary oqý oryndarynyń orys bólimshesine barýǵa nıetti emes. Bul týraly Astana halyqaralyq ýnıversıteti janyndaǵy Pedagogıka ınstıtýtynyń dırektory Janna Ahmadıeva aıtty, dep habarlaıdy QazAqparat tilshisi.

«Astanada jańa 42 mekteptiń salynýy úlkeıip kele jatqan elorda mektepteri úshin pedagog kadr daıyndaý problemasyn ózektendire túsedi. Búginde Astana aýmaǵyndaǵy 18 JOO-nyń ishinde úsheýi – L.Gýmılev atyndaǵy EUÝ, Astana halyqaralyq ýnıversıteti jáne A.Qusaıynov atyndaǵy Eýrazııa gýmanıtarlyq ýnıversıteti pedagog kadrlardy daıyndaıdy», - dedi ol Bilim salasy qyzmetkerleriniń respýblıkalyq tamyz keńesinde.

Onyń aıtýynsha, pedagog kadrlardy daıyndaý Abaı atyndaǵy Qazaq ulttyq pedagogıkalyq ýnıversıteti ázirlegen pedagogıkalyq bilimdi jańǵyrtý tujyrymdamasy aıasynda júrgiziledi.

Atalǵan qujat bıyl bekitilip otyr.

«Búkil respýblıka boıynsha pedagog kadrlardy teńdeı bólýiń oryn almaı otyrǵany qupııa emes. Orys tilinde sabaq beretin kadrlar jetispeýshiligi baıqalady. Mysal da keltireıin. Ótken jyly «hımııa» arnaýly bilim baǵdarlamasyna 38 talapker tústi. Onyń 36-sy qazaq bólimine, al ekeýi orys bólimine oqýǵa qabyldandy. Al bul JOO-ny ár stýdent úshin bilim berýdiń jeke-dara traektorııasyn qalyptastyrýǵa májbúrleıdi. Munyń ústine JOO úshin atalǵan stýdentterdi daıarlaý tıimdi emes. Nátıjesinde bul orys tilinde sabaq beretin kadr tapshylyǵyna, pedagog kadrlardyń qartaýyna alyp keledi», - dedi Janna Ahmadıeva.

Instıtýt dırektorynyń sózine qaraǵanda, elordadaǵy pedagogtardyń qajettiligin boljaýmen jáne anyqtaýmen Eýrazııa ulttyq ýnıversıtetiniń oqytýshylary aınalysady.

Olardyń dereginshe, 2026 jyldyń ózinde elordada shamamen 7,5 myń muǵalim tapshy bolmaq.