Mektepte «Ólketaný» kýrsy qaı synyptarda oqytylady
"Oqýlyq" ortalyǵy dırektorynyń orynbasary Ádilxan Dúısebektiń aıtýynsha, kýrs 5-shi, 6-shy jáne 7-shi synyptarda qazaq ádebıeti, geografııa, mýzyka men Qyzaqstan tarıxy pánderi negizinde ótedi. Kýrstyń jalpy ýaqyty - 20 saǵat. "Bul bólek pán emes. Árbir pánniń ishinde bolady. Máselen, 5-shi synypta 5 saǵat, 6-shi synypta 7 saǵat, al 7-shi synypta 8 saǵat qana oqytylady. Kýrstyń negizgi maqsaty - árbir oqýshyǵa týǵan aýyly, týǵan ólkesi týraly málimetterdi berip, onyń patrıottyq, eljandy sezimin damytý", - dedi Á.Dúısebek Astanada ótken baspasóz máslıxatynda.
Onyń aıtýynsha, oqýlyqtardy ázirleý jumysyna barlyq óńirler qatysty. Bas kezinde keıbir tarıxı oqıǵalar boıynsha kelispeýshilikter boldy. Oqýlyqtardyń alǵashqy nusqasy da sapasyz shyqty. Degenmen, 29 oqýlyq sońǵy saraptamadan ótti. "Árbir óńirdiń ózindik ereksheligi bar ǵoı. Rýxanı jádigerleri, tabıǵaty, tanymal tulǵalary - sonyń bárin shynaıy túrde, burmalaýsyz kórsetý kerek edi. Sondyqtan oqýlyqtardy ázirleýge jergilikti jerdiń ǵalymdary, pedagogtary men ólketanýshylary qatysty. Búginde bilim salasyndaǵy oqýlyqtardyń barlyǵy ortalyqtandyrylǵan júıe boıynsha ázirlenedi. Al "Ólketaný" oqýlyqtaryn óńirlerdiń ózderi daıyndady. Sol óńirlerde redaktsııalyq alqalar da quryldy. Jergilikti keńester óz pikirlerin berdi. Sonyń negizinde barlyq oqýlyqtar respýblıkalyq saraptama komıssııanyń qaraýyna túsken bolatyn. Eki saraptama boldy. Alǵashqyda barlyq oqýlyqtar keri qaıtaryldy. Sebebi kóptegen kemshilikter boldy. Sóıtip, 32 oqýlyqtyń 29-yn basýǵa ruqsat berildi", - dep atap kórsetti Á.Dúısebek.
Aıta keteıik, atalǵan bastama "Bolashaqqa baǵdar: rýxanı jańǵyrý" baǵdarlamasy aıasynda qolǵa alynyp otyr.
