Mektepte normaǵa sáıkes as mázirin ázirlemegender jazalandy
ASTANA. KAZINFORM — QR Oqý-aǵartý mınıstrligi júrgizgen tekserýlerdiń nátıjesinde 15 laýazymdy tulǵa ákimshilik jaýapkershilikke tartyldy.
Bıylǵy jyldyń basynan bastap QR Oqý-aǵartý mınıstrligi Balalardyń quqyqtaryn qorǵaý komıteti 242 bilim berý uıymyna tekserý júrgizdi, onyń ishinde 108 tekserý jergilikti jerlerge barý arqyly júzege assa, 13 tekserý jospardan tys turǵyndardyń aryz-ótinishteri negizinde júrgizildi.
2024 jyldan bastap «Bala quqyqtary týraly» QR Zańynyń 52-1 jáne 52-2-baptary kúshine endi, munda oblystar men respýblıkalyq mańyzy bar qalalarda bilim berý uıymdary men basqarý organdaryna qatysty memlekettik baqylaýdy júrgizýge qoıylatyn jańa tártip pen talaptar aıqyndalǵan. Atalǵan jumys balalardyń quqyqtaryn qorǵaý salasyndaǵy quqyqbuzýshylyq faktilerin anyqtaýǵa baǵyttalǵan.
Tekserýler 25 bilim bóliminde jáne óńirlerdiń segiz bilim basqarmasynda júrgizildi. Nátıjesinde 15 laýazymdy tulǵaǵa sot sheshimi boıynsha ákimshilik aıyppul salyndy, 65 tulǵa tártiptik jaýapkershilikke tartyldy.
— Mınıstrlik balalardyń quqyqtaryn qorǵaý salasyndaǵy jergilikti atqarýshy organdar tarapynan buzýshylyqtardy, onyń ishinde mekteptegi as máziriniń belgilengen tamaqtaný normalaryna sáıkes kelmeýi, sabaqtardy júıeli túrde ótkizetin balalarǵa áser etýdiń tıimdi sharalarynyń bolmaýy, oqýshylardyń jekelegen sanattaryna áleýmettik kómek kórsetý erejeleriniń saqtalmaýy jáne t. b. faktilerdi tirkedi. Bul máseleler jergilikti bılik pen bilim berý uıymdary tarapynan erekshe nazar aýdarýdy talap etedi, — dep atap ótti komıtet tóraǵasy Nasymjan Ospanova.
Tekserý qorytyndysy boıynsha Balalardyń quqyqtaryn qorǵaý komıteti 121 usynym jáne buzýshylyqtardy joıý týraly 151 nusqama joldady. Sondaı-aq, usynymdardyń oryndalýyn taldaý turaqty negizde júzege asyrylady, onyń barysynda Túrkistan, Jambyl jáne Qyzylorda oblystarynda berilgen usynymdardyń sapasyz oryndalýy anyqtaldy.
QR «Bilim týraly» Zańynyń 6-babyna sáıkes balabaqshalar, mektepter, qosymsha bilim berý uıymdary jergilikti atqarýshy organdardyń qaramaǵynda. Sondaı-aq, atalǵan uıymdardyń basshylaryn taǵaıyndaýdy ákimdikterdiń qurylymyndaǵy bilim basqarmalary júzege asyrady.
Aıta keteıik, balalardyń quqyqtaryn qorǵaý men qamtamasyz etý jumystary jalǵasýda.
Eske salsaq, osyǵan deıin Almatyda muǵalimder is júzinde kórsetilmegen qyzmetteri úshin tólemaqy alyp otyrǵany anyqtaldy.