Mektepte qulaǵan oqýshy jansaqtaý bóliminde jatyr
TALDYQORǴAN. QazAqparat - Taldyqorǵanda 4-synyptyń oqýshysy mektepte qulap, jansaqtaý bólimine tústi. Oqys oqıǵa qaladaǵy №2 mektepte úzilis kezinde bolǵan, dep habarlaıdy QazAqparat tilshisi.
Zardap shekken 9 jastaǵy oqýshynyń ákesi Erjan Qojahmetovtiń aıtynsha balasy mekteptegi baspaldaqtyń ustaıtyn jerimen syrǵanaımyn dep, qulap ketken. Sózinshe balasy úsh tisin syndyryp, eki tisin jutyp qoıǵan. Al oblystyq balalar aýrýhanasynyń bas dárigeri Marat Dosqalıev oqýshy aýrýhanaǵa óte aýyr jaǵdaıda túskenin aıtady.
«Basyna zaqym kelgen. Bas-súıegi synǵan. Biraq balaǵa ota jasaý qajet emes. Ázirge jansaqtaý bóliminde jatady», dedi bas dáriger.
Dárigerdiń aıtýynsha, bala bar soqqyny basynan alǵan. Al baspaldaqpen syrǵanap júrip qulap ketken Qýandyqtyń ákesi eshkimge kiná taqpaımyn deıdi. Tek balalar barynsha abaı bolsa dep tileıdi.
