Mektepte «Danalyq mektebi» klýby qalaı jumys istep jatyr
ASTANA.KAZINFORM - Elimizdiń bilim berý uıymdarynda ata-analardy pedagogıkalyq qoldaý ortalyqtarynyń bazasynda jumys isteıtin «Danalyq mektebi» otbasylyq tárbıe klýbtarynyń jumysy júıeli jalǵasyp jatyr.
Klýb otbasy men mektep arasyndaǵy ózara árekettestikti kúsheıtýge, ata-analardyń pedagogıkalyq mádenıetin arttyrýǵa jáne ulttyq tárbıe qundylyqtaryn saqtaýǵa baǵyttalǵan alań retinde qyzmet etedi.
Oqý-aǵartý mınıstrligi málimetinshe, klýb jumysy aıasynda «Áke ósıeti», «Áje danalyǵy», «Aǵa qamqorlyǵy» baǵyttary boıynsha kezdesýler, trenıngter jáne tárbıelik is-sharalar ótkiziledi. Bul sabaqtar urpaqtar sabaqtastyǵyn nyǵaıtýǵa jáne otbasylyq dástúrlerdi nasıhattaýǵa baǵyttalǵan.
2025-2026 oqý jylynyń basynan beri klýb aıasynda shamamen 33 myń is-shara uıymdastyryldy. Bıylǵy oqý jylynda sabaqtardyń mazmuny zamanaýı tárbıelik mindetterdi eskere otyryp jańartyldy.
Balalardyń ekologııalyq mádenıetin qalyptastyrýǵa, urpaqtar arasyndaǵy úılesimdi qarym-qatynasty damytýǵa, oqýshylardy kitap oqýǵa baýlýǵa, qarjylyq saýattylyqty arttyrýǵa, sondaı-aq óskeleń urpaqty tárbıeleýdegi otbasy músheleriniń róli men jaýapkershiligin uǵyndyrýǵa erekshe nazar aýdarylyp jatyr.
Eske sala keteıik, ata-analardy pedagogıkalyq qoldaý ortalyqtary 2023 jyldan bastap elimizdiń barlyq mektebinde «Adal Azamat» birtutas tárbıe baǵdarlamasy aıasynda jumys isteıdi.
«Danalyq mektebi» klýby tek is-sharalar uıymdastyrý formaty retinde ǵana emes, sonymen qatar otbasylyq qundylyqtardy nyǵaıtýǵa, ózara qurmetti qalyptastyrýǵa jáne árbir qoǵam múshesiniń azamattyq jaýapkershiligin arttyrýǵa yqpal etetin rýhanı-tárbıelik alań retinde qarastyrylady.
Aıta keteıik, jemqorlardan tárkilengen qarajat esebinen 89 myń oqýshyǵa oryn ashyldy.