Mektepte bomba baryn habarlaǵan atyraýlyq psıhıatrııalyq stantsıonarǵa jatqyzyldy

Mektepte bomba bary týraly jalǵan aqparat bergen atyraýlyq psıhıatrııalyq stantsıonarǵa jatqyzyldy, dep habarlaıdy Kazinform. 

Oblystyq polıtsııa departamentiniń baspasóz qyzmetinen málim etkendeı, 27 jastaǵy turǵyn anasynyń mobıldi telefonynan 102 nómerine qońyraý shalǵan.

«Kúdikti mektepterdiń birinde jarylǵysh zat qoıylǵany týraly jalǵan aqparat bergen. 1996 jylǵy jigittiń terrorızm aktisi týraly kórineý jalǵan habarynan keıin oqıǵa ornyna Atyraý oblystyq polıtsııa departamentiniń, oblystyq prokýratýranyń, UQK oblystyq departamenti men oblystyq tótenshe jaǵdaılar departamentiniń qyzmetkerleri baryp, tekserý júrgizdi. Tekserý kezinde jarylǵysh quraldyń joqtyǵy anyqtaldy», - dep habarlady departamenttiń baspasóz qyzmeti.

Keıin 27 jastaǵy jigittiń anasy sot otyrysynda balasynyń aýyratynyn, oqıǵa bolǵan kúni aýrýhanadan ekpe alyp, jaı-kúıi nasharlaǵanyn aıtqan. Sol kúni kúdiktiniń ózi qaıda telefon soqqanyn bilmeıtinin, buryn da dál osyndaı jaǵdaı bolǵanyn, sol sebepten, oǵan ambýlatorııalyq emdeýdi taǵaıyndaýdy suraǵan.

«Sot-psıhıatrııalyq saraptamanyń qorytyndysyna saı atalǵan azamat «Paranoıdty shızofrenııa úzdiksiz aǵyn túri, turaqty aqaýmen» sozylmaly psıhıkalyq buzylýymen aýyratyny rastalǵan. Kúdikti QR Qylmystyq kodekstiń 273-babynda kózdelgen qylmystyq quqyq buzýshylyqty jasaǵany úshin qylmystyq jaýaptylyqtan bosatyldy. Oǵan Atyraý oblystyq psıhıkalyq densaýlyq ortalyǵynyń jalpy úlgidegi psıhıatrııalyq statsıonarda májbúrlep emdeý taǵaıyndaldy», - dep málim etti departamenttiń baspasóz qyzmetinen.

Eske sala ketelik, buǵan deıin Atyraýda mas sheteldiktiń kesirinen tórt kólik soqtyǵysqanyn jazǵan bolatynbyz.