Mektepte bomba bar: ShQO-da jasóspirim polıtsııaǵa jalǵan habar jibergen

ÓSKEMEN. KAZINFORM – Shyǵys Qazaqstan oblysy Shemonaıha aýdanynda jasóspirim mektepke jarylǵysh zat qoıylǵany jaıly polıtsııaǵa habarlaǵan.

Polıtsııanyń kezekshi bólimine mektepke jarylǵysh zat qoıylǵany týraly habar kelip túsken. Onyń ras-ótirigin anyqtaý úshin polıtsııa qyzmetkerleri men kınolog mamandar jumyldyryldy. 

«Olar mektepke kelip, tolyqqandy tekserý júrgizdi. Alaıda bul aqparat jalǵan bolyp shyqty. Jedel izdestirý sharalary barysynda kúdikti anyqtaldy. Ol sol mekteptiń 13 jastaǵy oqýshysy bolyp shyqty. Jasóspirim ázil úshin jalǵan habar taratqanyn moıyndady», - dep habarlady ShQO polıtsııa departamentiniń baspasóz qyzmetinen. 

Tártip saqshylary oqýshymen jáne onyń zańdy ókilderimen profılaktıkalyq áńgime júrgizdi. Ata-anasy kámeletke tolmaǵan balasyn tárbıeleý jónindegi mindetterdi sáıkesinshe oryndamaǵany úshin ákimshilik jaýapkershilikke tartyldy.

«Osy rette, terrorıstik aktiler týraly jalǵan habarlama taratqandar úshin 14,5 mln teńgege deıin aıyppul salynatynyn nemese 5 jylǵa deıin bas bostandyǵynan aıyrylý jazasy qarastyrylǵanyn eskertemiz. 14 jasqa tolǵan balalar qylmystyq jaýapkershilikke tartylady», - delingen aqparatta. 

Eske salsaq, osyǵan deıin Óskemende 16 mln teńge jymqyrǵan balabaqsha esepshisi sottalǵany habarlanǵan.