Mektepte bilim berýdiń ınfraqurylymy jasaqtaldy

ASTANA. KAZINFORM — Ortalyq kommýnıkatsııalar qyzmeti alańynda ótken baspasóz-konferentsııasynda «Keleshek mektepteri» ulttyq jobasy aıasynda mektep qurylysynyń qorytyndylary jarııalandy. 

Joba jańa mektep ınfraqurylymy modelin qalyptastyrýǵa baǵyttalǵan.

Oqý-aǵartý vıtse-mınıstri Jaıyq Sharabasovtyń aıtýynsha, úsh jyldyń ishinde halyqaralyq standarttarǵa saı keletin 460 myń oqýshy ornyna arnalǵan 217 jańa formattaǵy mektep salyndy.

Barlyq nysan biryńǵaı standart boıynsha salynǵan. Onyń ishinde 87 mektep aýyldyq jerlerde ornalasqan. Bul qalalyq jáne aýyldyq mektepter arasyndaǵy ınfraqurylymdyq alshaqtyqty aıtarlyqtaı azaıtty.

— Jańa formattaǵy mektepter zamanaýı pándik kabınetterimen, STEM-zerthanalarymen jáne robototehnıka kabınetterimen, sondaı-aq shyǵarmashylyq ortalyqtar, sheberhanalarmen jabdyqtalǵan. Oqý keńistikteri ár oqýshyǵa arnalǵan jeke shkaf pen jyljymaly partalar, aýyzsý fontandarymen qamtamasyz etilgen. Sonymen qatar, fızıkalyq belsendilikti damytýǵa erekshe nazar aýdarylǵan: 2–4 sport zaldary jáne fýtbol, basketbol, voleıbol jáne vorkaýt alańdary qarastyrylǵan. Soltústik aımaqtardaǵy klımattyq jaǵdaılardy eskere otyryp hokkeı alańdary, al ońtústikte tennıs alańdary salynǵan, — dedi Jaıyq Sharabasov.

Nysandardyń sapasyn qamtamasyz etý maqsatynda qurylys konstrýktsııalary úshin — 5 jyl, jabdyqtar men jıhaz úshin — 3 jyl kepildik merzimderi belgilengen. Bul mektepterdi sapaly jáne uzaq merzimdi paıdalanylýdy qamtamasyz etedi. 

Aıta ketelik Qazaqstanda tsıfrlyq mektepter damıtyny jóninde jazǵan edik.