Mektepte bilim berýdiń strategııalyq ári taktıkalyq maqsattaryn anyqtaý qajet - QR Bilim jáne ǵylym mınıstrligi
ASTANA. 16 mamyr. QazAqparat - Búgingi tańda mektepte bilim berýdiń strategııalyq ári taktıkalyq maqsattaryn anyqtaý qajet. Búgin Astanadaǵy Qazaq ulttyq óner ýnıversıtetinde bastalǵan QR Fılologtarynyń I sezinde QR Bilim jáne ǵylym mınıstrligi orta jáne mektepke deıin bilim departamentiniń dırektory Jańyl Jantaeva osylaı aıtty.
Onyń habarlaýynsha, búginde Qazaqstannyń bilim berý salasyn damytýdyń 2020 jylǵa deıingi memlekettik baǵdarlamasynda kóptildi bilimge erekshe basymdyq berilip otyr. Osyǵan baılanysty fılologııa salasyn jańǵyrtý arqyly ony ultaralyq kelisimniń negizgi quraly retinde aıqyndaý josparlanǵan. «Al búgingi forýmda álemdik bilim berý keńistigine ený jaǵdaıynda mektep fılologııasyn jańartýdyń ózekti máseleleri talqylanady. Sonyń ishinde mektepte ádebıet pen tildi oqytýdyń elektrondy júıesin jetildirý, fılologııalyq pánderdiń mazmunyn jańartý, bilim berýdiń barlyq deńgeıinde aǵylshyn tilin erte jasta mańgerý, oqýshylardyń fýnktsıonaldy saýattylyǵyn damytý, jańa oqý-ádistemelik quraldary daıyndaý jáne taǵy basqa problemalar bar. Búginde osy máselelerdi talqylap, olardy sheshý joldarynyń strategııalyq jáne taktıkalyq maqsattaryn anyqtaý qajet», - dep atap kórsetti J.Jantaeva.
