Mektepte amandasý ádebin tárbıe jumysynyń elementi retinde engizý qajet — Erlan Saıyr
ASTANA. KAZINFORM — Mektepterde amandasý ádebin kúndelikti tárbıe jumysynyń turaqty elementi retinde engizý qajet. Bul týraly Quryltaı otyrysynda Mádenıet jáne aqparat mınıstrligi men Oqý-aǵartý mınıstrlerine saýal joldaǵan depýtat Erlan Saıyr aıtty.
— Prezıdent Qasym-Jomart Toqaev «Basty mindet halqymyzdyń baǵa jetpes qazynasy ulttyq murany» saqtaý dep atap ótti. Memleket basshysynyń amandasý ádebin ulttyq qundylyqtarǵa saı damytý máselesin kóterýi de osy saıasattyń naqty kórinisi. El úshin mádenıet — kontsert, teatr nemese mýzeımen ǵana shektelmeıdi. Mádenıet — adamnyń kúndelikti minez-qulqynan, júris-turysynan, qoǵamdaǵy ádebinen kórinetin ómir salty. Osy turǵyda amandasý mádenıeti — ulttyq biregeıliktiń eń qarapaıym ári eń kórnekti elementiniń biri, — dedi ol.
Depýtattyń atap ótýinshe, qazaq qoǵamynda da amandasýdyń ózindik qalyptasqan júıesi bolǵan. Bul dástúrlerdiń astarynda úlkendi syılaý, kishini qurmetteý, aǵaıyn arasyndaǵy baılanysty saqtaý sııaqty qundylyqtar jatyr.
— Qazaq sálemdesýiniń basty ereksheligi — ustamdylyq. Sálemdesý — sol mádenı kodtyń eń qarapaıym, biraq eń tereń belgileriniń biri. Al mádenı kod úlken urandardan emes, kúndelikti ádetten bastalady. Sondyqtan bul máseleni bir rettik aktsııa nemese tárbıe jumysy retinde emes, ulttyq biregeılikti nyǵaıtatyn uzaq merzimdi memlekettik mádenı saıasattyń bir baǵyty retinde qarastyrýdy usynamyz, — dedi Erlan Saıyr.
Osyǵan baılanysty Quryltaı depýtaty:
— amandasý ádebin ulttyq qundylyqtarǵa negizdelgen áleýmettik norma retinde qalyptastyrýdyń naqty ádistemelik usynymdaryn daıyndaýdy;
— mektepterde amandasý ádebin kúndelikti tárbıe jumysynyń turaqty elementi retinde engizýdi;
— synyp saǵattary, mektep erejeleri, tálimgerlik, ata-anamen jumys, pedagogterdiń jeke úlgisi jáne mekteptiń kúndelikti mádenı ortasy arqyly amandasý ádebin ornyqtyrý tetikterin qarastyrýdy;
— mektepke deıingi, orta, tehnıkalyq jáne kásiptik, joǵary bilim berý júıelerimen birlesip, ulttyq ádep normalaryn zamanaýı tárbıe jumysynyń mazmunyna engizý jóninde naqty usynystar ázirleýdi surady.
Buǵan deıin Quryltaı depýtattary balalardyń áleýmettik jelige tirkelýine shekteý qoıý tetigin naqtylaý máselesin kóterip, 2030 jylǵa deıin árbir aýyl balasyna keminde bir tegin úıirme nemese sektsııaǵa naqty qoljetimdilikti qamtamasyz etetin keshendi jospar ázirleýdi usyndy.
