Mektepte aqsha jınaýdy ata-analar komıteti uıymdastyrady - agenttik

ASTANA. QazAqparat - Mektepterde aqsha jınaý sharalaryn negizinen ata-analar komıteti uıymdastyrady. Bul týraly Astanada ótken brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Astana qalasy boıynsha departament basshysy Jazıra Jylqyshıeva málim etti, dep habarlaıdy QazAqparat tilshisi.

«Memleket basshysynyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynda sybaılas jemqorlyqqa qarsy belsendi kúres júrgizý qajettigin atap ótti. Prezıdent memlekettik kórsetiletin qyzmet sheńberinde memlekettik qyzmetshilerdiń halyqpen tikeleı baılanysyn qysqartý jóninde odan ári sharalar qabyldaýdy, birinshi basshylardyń jeke jaýapkershiligin arttyrý máselesi boıynsha jumystar atqarýdy tapsyrdy. Sondaı-aq, Memleket basshysy «Sybaılas jemqorlyqtan ada óńirler» jobalary aıasynda elordanyń jemqorlyqqa qarsy strategııany júzege asyrý jónindegi tájirıbesin taratý týraly tapsyrma berdi. Astanada aqpan aıynan bastap Agenttiktiń ákimdikpen birlesken «Astana - adaldyq alańy» jobasy júzege asyrylýda. Joba - turmystyq jemqorlyqty joıýǵa jáne azamattarǵa qolaıly jaǵdaı jasaýǵa baǵyttalǵan», - dep toqtaldy Jylqyshıeva.

Memleket basshysy atap ótkendeı, bilim berý júıesinde jemqorlyq táýekelderin tómendetý boıynsha jumystar atqaryldy.

«Sońǵy 4 aıda Bilim basqarmasynyń jáne onyń baǵynysty uıymdarynyń qyzmetine taldaý júrgizildi. Oǵan sybaılas jemqorlyq táýekelderiniń, «jasyryn» memlekettik qyzmetterdiń, normatıvtik quqyqtyq aktilerdegi jáne ákimshilik kedergilerdegi qaıshylyqtardyń bolýy sebep boldy. Joba qoǵamdyq uıymdarmen birlesip oqýshylardyń ata-analary arasynda áleýmettik saýalnama júrgizdi. Saýalnama nátıjesi bilim berý mekemelerinde mekteptiń nemese synyptyń qosymsha qajettilikteri úshin jıi aqsha jınalatyndyǵyn kórsetti. Negizinen qarajat jınaý «ata-analar komıteti» arqyly júzege asyrylady», - deıdi departament basshysy.

Osy oraıda, joba keńsesi QR Bilim jáne ǵylym mınıstrligine ata-analar komıtetine tyıym salý jóninde usynys engizilgen.

«Ata-analar komıtetiniń qyzmeti reglamenttelmegen jáne turmystyq jemqorlyqtyń týyndaýyna sebep bolady. Bilim berý mekemeleriniń azamattarmen ózara árekettesýiniń kez-kelgen tártibi normatıvtik quqyqtyq aktilermen retteledi.Qabyldaý, aýysý, granttar bólý, jataqhanadaǵy oryndardy anyqtaý jáne basqa da barlyq osyndaı protsester tıisti normatıvtik quqyqtyq aktilerde anyq kórsetilgen», - dedi Jazıra Jylqyshıeva.