Mektepte aqsha jınaý faktilerinde dırektor jazaǵa tartylady
«Bizdiń memleket protsesterdi tolyq tsıfrlandyrý jolynda. Bul sharalar ákimshilik kedergilerdi joıýǵa yqpal etedi. Degenmen, búgingi kúni barlyq rásimder tsıfrlanbaǵan. Nátıjesinde, laýazymdy tulǵalardyń óz ókilettilikterin asyra paıdalanatyn sátteri kezdesedi. Shamadan tys qujattar men reglamenttelmegen aqparat talap etiledi. Oqý jylynyń qarsańynda biz Halyqqa qyzmet kórsetý ortalyǵynyń usynatyn qyzmetine taldaý júrgizdik. Mektepterdiń qajetsiz qujattardy talap etýiniń saldarynan HQKO-da kezekte turǵan ata-analardyń sany jetip artyldy. Tıisti aqparat Bilim basqarmasyna jiberildi. 5 mektep dırektoryna qatysty tártiptik sharalar qabyldandy. 10 dırektorǵa qatań eskertý jasaldy», - dedi Jylqyshıeva Astanada ótken brıfıngte.
Budan bólek, jataqhanalarǵa zańsyz ornalastyrý faktiler anyqtalyp, zańsyz turyp jatqandar jataqhanadaǵy oryndaryn bosatty.
«Bul faktiler bilim berý mekemeleriniń ákimshilikteri belgili bir zańnamalardy saqtamaıtyndyǵyn kórsetedi. Memleket búginde bilim berý mekemeleri úshin jetkilikti qarjylandyrýdy qamtamasyz etedi. Qarajat barlyq qajettilikterge bólinedi. «Aqparatqa qol jetkizý týraly» Zańda bilim berý mekemeleriniń bıýdjet qarajatyn ınternet-resýrstarda jáne basqa da qoljetimdi saıttarda jarııalaý qajettiligi jóninde mindettemeleri naqty anyqtaıdy. Ashyqtyq pen esepberýshilik - sybaılas jemqorlyqqa qarsy saıasattyń negizderiniń biri. Azamattar bıýdjet qarajatynyń qaıda jumsalatyny týraly bilýi qajet. Bilim berý mekemeleriniń onlaın-resýrstaryn taldaı otyryp, atalǵan talaptardyń saqtalmaıtyny týraly qorytyndy jasadyq», - dedi departament basshysy.
Onyń atap ótýinshe, barlyq uıymdastyrýshylyq jáne sharýashylyq protsester birinshi basshynyń únemi qadaǵalaýynda bolý kerek. Osy ýaqytqa deıin belgili bir protsedýralardy buzǵany úshin oryndaýshylar nemese orynbasarlary ǵana jaýapkershilikke tartylý tájirıbesi boldy. Bul tájirıbeni joıý qajet.
«27 tamyzda Agenttik tóraǵasy, elorda ákimi jáne Bilim jáne ǵylym mınıstriniń kezdesýinde bilim basqarmasynyń vedomstvolyq baǵynysty uıymdarynyń basshylary jeke jaýapkershilik pılottyq qujatyna qol qoıdy. Endi aqsha jınaý, zańdy buzý, qyzmettiń ashyqtyǵyn saqtamaý faktileri anyqtalǵan jaǵdaıda, dırektorlarǵa qatysty tıisti sharalar qabyldanatyn bolady. Birinshi basshylar keń ókilettiktermen ǵana emes, sondaı-aq joǵary jaýapkershilikpen erekshelenýi kerek», - dedi Jazıra Jylqyshıeva.