Mektepke jol: SQO-da 9 myńǵa jýyq balaǵa materıaldyq kómek kerek

PETROPAVL. KAZINFORM — Soltústik Qazaqstan oblysynda az qamtylǵan otbasylardan shyqqan oqýshylarǵa jańa oqý jyly qarsańynda kómek kórsetilip jatyr. 

Dástúrli «Mektepke jol» aktsııasynyń basty maqsaty — áleýmettik sebepterge baılanysty balanyń mektepke barmaı qalýyna jol bermeı, materıaldyq qoldaý kórsetý. SQO Bilim basqarmasynyń málimetinshe, bıyl oblys boıynsha 8706 oqýshy bir rettik járdemaqy alýǵa úmitker retinde tirkelgen. Bul maqsatqa 402,5 mln teńge josparlandy.

— Qazirgi tańda 6136 oqýshyǵa jalpy somasy 283,6 mln teńge mólsherinde kómek kórsetildi. Qarjylaı kómek «Jalpy bilim» qory arqyly júzege asyrylady jáne ata-analardyń arnaıy shottaryna aýdarylady. Ol úshin rastaıtyn qujattardy usynýy qajet. Bıyl birrettik járdemaqy mólsheri 46 228 teńge, — dedi bilim basqarmasynyń ókilderi.

Mamandardyń aıtýynsha, aktsııa aıasynda demeýshiler de qoldaý bildirgen. Búgingi kúnge deıin 893 balaǵa 1,1 mln teńge mólsherinde kómek kórsetildi. Bul qarajatqa mektep formasy, aıaq kıim jáne oqý quraldary sekildi qajetti zattar alyndy. Aktsııa áli de jalǵasady.

Buǵan deıin Qyzylordada memleket kómegin almaǵan balalarǵa demeýshiler járdemdesetinin jazǵan edik.