«Mektepke jol» respýblıkalyq qaıyrymdylyq aktsııasy bastaldy

ASTANA. KAZINFORM – Elimizdiń barlyq óńirinde «Mektepke jol» respýblıkalyq qaıyrymdylyq aktsııasy bastaldy. Bul týraly Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova aıtty.

«Ózderińiz de biletindeı, jyl saıyn 1 tamyzdan 30 qyrkúıekke deıin elmizdiń barlyq óńirinde «Mektepke jol» respýblıkalyq qaıyrymdylyq aktsııasy ótkiziledi. Aktsııa oqý jylynda daıyndyq kezeńinde az qamtylǵan otbasylardyń balalaryn demeýshilik qoldaý kórsetýge baǵyttalǵan», - dedi komıtet tóraǵasy Ortalyq kommýnıkatsııalar qyzmetindegi brıfıngte.

Onyń atap ótýinshe, aktsııa barysynda «jedel jelilerdiń», «senim telefondarynyń», qoǵamdyq qabyldaý bólmeleriniń úzdiksiz jumysy uıymdastyryldy. Sondaı-aq, kómekke muqtaj nemese qoldaý kórsetýge daıyn jandar Balalardyń quqyqtaryn qorǵaý komıtetiniń 74-25-28 senim telefonyna nemese «BALA QORǴAÝ» Telegram chatyna júgine alady.

«Komıtet ómirlik qıyn jaǵdaıǵa tap bolǵan otbasylar men balalarǵa beı-jaı qaramaıtyn, júregi keń azamattardy atalǵan aktsııaǵa belsendi qatysýǵa shaqyrady», - dedi Nasymjan Ospanova.