Mektepke jol: Pavlodarda 12 myńnan astam oqýshy kómekke muqtaj

PAVLODAR. KAZINFORM — Ertis-Baıan óńirinde «Mektepke jol» aktsııasy bastaldy. Onyń aıasynda 12 myńnan astam balaǵa materıaldyq járdem jasalady.

Óńirlik bilim berý basqarmasynyń dereginshe, oblystyń 12 myńnan asa mektep oqýshysy kómekke zárý. Olardyń deni — kópbalaly, az qamtylǵan otbasylarda tárbıelenip jatqan balǵyndar.

— Aktsııa barysynda júrgiziletin negizgi is-sharalar bar. Olar áleýmettik az qamtylǵan otbasylarǵa kómek kórsetý, qaıyrymdylyq sharalaryn uıymdastyrý. Demeýshilerdiń esebinen oqýshylarǵa mektepke qajetti qural-jabdyqtar, kıim, aıaq kıim, portfel men keńse jabdyqtary satyp alynyp jatyr. Jergilikti bilim bólimderindegi áleýmettik qorǵaý qyzmetkerleri muqtaj otbasylardyń tizimin jasaıdy. Mekteptermen birlese otyryp naqty kómekti qajet etetin balalar anyqtalady, — deıdi Pavlodar oblysy bilim berý basqarmasy balalardyń quqyqtaryn qorǵaý jáne ınklıýzıvti bilim berý bóliminiń bas mamany Samal Álimova.

Mamandar aktsııa barysynda reıdter júrgizip, jármeńkeler uıymdastyrady. Jármeńkeler aýdan-qalalardaǵy bazarlar aýmaǵynda ótedi. Munda oqý quraldary men kıim-keshek dúkenderden áldeqaıda arzan baǵada usynylady.

Eske sala keteıik, Astanada 8500-den asa bala mektep jabdyqtaryn tegin alady.