Mektepke jol: OQO-da 50 otbasyǵa kómek kórsetildi

ShYMKENT. QazAqparat - Ońtústik Qazaqstan oblysynyń jastar saıasaty máseleleri jónindegi basqarmasynyń «Jastar resýrstyq ortalyǵy» memlekettik kommýnaldyq mekemesi men «Bizben birge» eriktiler mektebi «Mektepke jol» aktsııasyn uıymdastyrdy.

Oblys ákimdigi baspasóz qyzmetiniń habarlaýynsha, 1 tamyz ben 30 qyrkúıek aralyǵynda ótetin respýblıkalyq «Mektepke jol» aktsııasy bıyl toǵyzynshy jyl jalǵasýda. Іs-sharanyń basty maqsaty - Elbasynyń oqýshylardyń mektepke daıyndyǵyn tolyq qamtamasyz etý týraly tapsyrmasyna sáıkes, kóp balaly otbasylar, jetim, jartylaı jetim jáne ata-ana qamqorlyǵynsyz qalǵan balalarǵa qamqor bolyp, olardyń áleýmettik sebepter saldarynan mektepke bara almaýynan aldyn alý.

Jalpy, statıstıkalyq málimetterge súıensek, oblysymyzda áleýmettik kómekke muqtaj 15 934 jas esepke alynǵan. Osyǵan oraı, «Bizben birge» eriktileri Dostyq, Chapaevka jáne Qaınar bulaq shaǵyn aýdanynda turatyn 50 -den asa túrli jaǵdaıdaǵy kóp balaly jáne tolyq emes otbasylarǵa mektepke qajetti qural-jabdyqtarymen qamtamasyz etip kómek kórsetti.

Aıta keteıik, jyl saıyn 1 tamyzdan bastap «Mektepke jol» qaıyrymdylyq aktsııasy ótkiziledi. Bul qaıyrymdylyq shara áleýmettik az qamtylǵan otbasylardyń balalaryna kómek kórsetýge baǵyttalǵan. Aktsııa eldiń barlyq aımaqtarynda ótkizildi. 8 jyl ishinde 2 mln astam bala qajetti kómekke ıe boldy. Bıyl aktsııa «Baqytty balalyq mekeni» uranymen ótkizilýde.