Mektepke jol: Mınıstr qaıyrymdylyq jasaýǵa shaqyrdy
NUR-SULTAN. QazAqparat – QR Bilim jáne ǵylym mınıstri Ashat Aımaǵambetov qazaqstandyqtardy «Mektepke jol» aktsııasy aıasynda qaıyrymdylyq jasaýǵa shaqyrdy, dep habarlaıdy QazAqparat.
«Aldymyzda jańa oqý jyly kele jatyr. Sáıkesinshe, oqýshylarymyzǵa oqý quraldary men mektep formasy qajet ekenin bilesizder. Osy máseleni sheshý úshin jyl saıyn elimizdiń barlyq óńirinde 1 tamyz ben 30 qyrkúıek aralyǵynda «Mektepke jol» respýblıkalyq qaıyrymdylyq aktsııasy ótedi.
Bilim jáne ǵylym mınıstrliginiń bastamasymen 2008 jyldan beri uıymdastyrylyp kele jatqan aktsııa az qamtylǵan, kópbalaly jáne turmysy tómen otbasylardyń balalaryna, ata-anasynyń qamqorlyǵynsyz qalǵan balalarǵa arnalǵan», - dep jazdy mınıstr Feısbýk jelisinde.
Onyń aıtýynsha, 2018 jyly aktsııa aıasynda 328 766 oqýshy 2 mlrd 822 mln 846 myń teńgege materıaldyq jáne qarjylyq kómek alǵan. Memleket basshysynyń arnaıy tapsyrmasyna sáıkes, «Mektepke jol» aktsııasy 2 aı ǵana emes, jyl boıy iske asatyn bolady.
«Bizdiń mınıstrlik «Meniń Atamekenim» qoǵamdyq birlestiginiń ókilderimen kezdesip, qosymsha portal arqyly onlaın túrde kómek kórsetý týraly kelisimge keldik. Endigi kezekte demeýshiler men metsenattar www.atamekenim.kz portalynda ornalasqan ótinim jáne tizim boıynsha muqtaj otbasylarǵa kómek kórsete alady. Sonymen, búginnen bastap «Meniń Atamekenim» qoǵamdyq birlestiginiń portalynda «Mektepke jol» aktsııasynyń jumysyn resmı túrde iske qosamyz», - dedi vedomstvo basshysy.
Onlaın portal arqyly balaǵa bir ret qana emes, jyldyń ár mezgilinde qajetti qural-jabdyqpen kómekteseýge bolady.
Ekinshiden, kómekke muqtaj jandar men qaıyrymdylyq jasaıtyn azamattardyń arasynda tikeleı baılanys ornatylady.
Úshinshiden, kómekke zárý adamdardyń shynaıylyǵyn rastap, olardyń kómekten tys qalmaýy qamtamasyz etiledi.
Tórtinshiden, qarajattyń túsýi men paıdalanylýyn onlaın túrde baqylaýǵa bolady.
«Qurmetti dostar! «Mektepke jol» aktsııasy jyl boıy jalǵasady. Memlekettik qyzmetkerlerdi, bıznesmen-metsenattardy, bilim basqarmalarynyń basshylaryn, rektorlardy jáne barshańyzdy osy aktsııaǵa belsendi túrde qatysýǵa shaqyramyn. Kez kelgen isti basqaǵa aıtpas buryn, ózim úlgi bolýym kerek degen oımen aktsııany ózimnen bastaıyn dep otyrmyn. Jaqsylyq jasaıyq dostar!», - dep jazdy Ashat Aımaǵambetov.
