«Mektepke jol»: Kómekke muqtaj atyraýlyqtar jedel jelige habarlasa alady

ATYRAÝ. QazAqparat – Atyraý oblysynda «Mektepke jol» aktsııasy aıasynda 20 myńǵa jýyq oqýshyǵa kómek beriledi. Kómekke muqtaj otbasylardan ótinim qabyldaý úshin jedel jeliler iske qosyldy, dep habarlaıdy QazAqparat.

Oblystyq bilim basqarmasy baspasóz qyzmetiniń málimetinshe, «Mektepke jol» qaıyrymdylyq aktsııasy ótip jatyr.

«Qaıyrymdylyq is-sharasy aıasyndaǵy kómekti kópbalaly jáne az qamtylǵan, sondaı-aq ataýly áleýmettik kómek alatyn otbasylardyń balalar alady. Qazir oblystyń bilim berý mekemelerinde jedel jeliler iske qosylyp, úzdiksiz jumysy uıymdastyrylyp otyr. Qıyn ómirlik jaǵdaıǵa tap bolǵan barlyq bala men ata-ana kómek suraı alady.

Aktsııaǵa kez kelgen adam qatysa alady. Eriktiler, bıznesmender, metsenattar, úkimettik emes uıymdar men ózge de turǵyndardyń muqtaj otbasylar men balalarǵa qoldaý kórsetýine múmkindigi bar. Muqtaj jandar jedel jeliler arqyly kómek suraı alady», -deıdi Atyraý oblystyq bilim basqarmasy basshysynyń mindetin atqarýshy Aınagúl Dúısekenova.

Onyń aıtýynsha, Oqý-aǵartý mınıstrligi Balalardyń quqyǵyn qorǵaý komıteti «Mektepke jol» respýblıkalyq qaıyrymdylyq aktsııasyna bastaý berdi. Balalar jylynda bul shara «Mektepke jol – shekarasyz jaqsylyq» ataýymen ótip jatyr. Aktsııa 31 tamyzǵa, ıaǵnı jańa oqý jyly bastalǵanǵa deıin jalǵasady.

«Mektepke jol» aktsııasy aıasynda kómek alý úshin ata-analar bilim basqarmalary men mektepterge habarlasýy qajet.

Eske sala ketelik, budan buryn Atyraý munaıshylary asyraýshysynan aıyrylǵan kópbalaly anaǵa páter syılaǵanyn habarlaǵan bolatynbyz.