Mektepke jol: Qyzylordada memleket kómegin almaǵan balalarǵa demeýshiler járdemdesedi
QYZYLORDA. KAZINFORM — Qyzylorda oblysynda 1 tamyz ben 30 qyrkúıek aralyǵynda «Mektepke jol» respýblıkalyq qaıyrymdylyq aktsııasy ótip jatyr.
Oblystyq bilim basqarmasynyń habarlaýynsha, bıyl 40 myńǵa jýyq balaǵa mindetti oqý qory arqyly birrettik qarjylaı kómek berý josparlanǵan. 46 myń teńgeden asatyn qarjylaı kómekti 15 tamyzǵa deıin 36 265 bala aldy.
— Birrettik kómek bes topqa — memlekettik ataýly áleýmettik kómek alýǵa quqyǵy bar, memlekettik ataýly áleýmettik kómek almaıtyn, jan basyna shaqqandaǵy tabysy eń tómen kúnkóris deńgeıiniń shamasynan tómen, tótenshe jaǵdaı saldarynan shuǵyl járdemdi talap etetin otbasylardan shyqqan, otbasylarda turatyn jetim jáne ata-anasynyń qamqorlyǵynsyz qalǵan balalarǵa, bilim berý uıymynyń alqaly basqarý organy aıqyndaıtyn bilim alýshylar men tárbıelenýshilerdiń ózge de sanattaryna tıesili. Ony ártúrli sebeppen ala almaǵan áleýmettik osal toptaǵy otbasylardyń balalary «Mektepke jol» respýblıkalyq aktsııasy aıasynda demeýshiler tarapynan qamtamasyz etiledi, — delingen habarlamada.
Aktsııa barysynda demeýshilerdiń qoldaýymen 228 oqýshy oqý formasymen, 117 oqýshy aıaq kıimmen, 489 oqýshy oqý quraldarymen, 343 oqýshy qarjylaı kómekpen qamtamasyz etildi. 5-31 tamyz aralyǵynda qala men aýdandarda mektep formalarynyń jármeńkesin ótkizý josparlandy. Onda jergilikti kásipkerler jańa oqý jylyna qajet kıim, qural-jabdyqtardy arzan baǵamen usynady.
Eske salaıyq, aldaǵy jańa oqý jylynda Qyzylorda oblysy boıynsha 17 423 bala 1-synypqa barady.