Mektepke jol: BQO-da 2 myńǵa jýyq oqýshyǵa 92 mln teńge kómek kórsetildi

ORAL. KAZINFORM — Batys Qazaqstan oblysynda jalpyǵa birdeı bilim berý qorynan oqýshylarǵa keńse taýarlary, mektep formasy, sporttyq kıim, aıaqkıim jáne basqa kerekti zattardy satyp alý úshin 434 mln teńge qarastyryldy.

BQO bilim basqarmasy basshysynyń mindetin ýaqytsha atqarýshy Aqjarqyn Temirhanovanyń óńirlik kommýnıkatsııalar qyzmeti alańynda ótken brıfıngte málim etkenindeı, kúni búginge deıin 1 991 oqýshyǵa 92 mln teńge kóleminde kómek kórsetildi. 

Onyń sózine qaraǵanda, ár balanyń ata-anasynyń kart-shottaryna 46 228 teńgeden aýdaryldy. 

- Jergilikti bıýdjet esebinen Qazaqstan Úkimetiniń 2008 jylǵy 25 qańtardaǵy № 64 qaýlysy negizinde jalpyǵa birdeı bilim berý qorynan memlekettik ataýly áleýmettik kómek alýǵa quqyǵy bar otbasylardan shyqqan balalarǵa, sondaı-aq basqa da sanatqa kiretin jetkinshekterge kómek kórsetiledi. Ata-ana bilim berý uıymdaryna baryp, mektep dırektoryna ótinish jazady. Sanatqa sáıkes kómek alatyn ata-ana bankterde arnaıy shot ashady, aqsha soǵan aýdarylady. Qarajatqa alynǵan kıim, aıaqkıim, oqý quraldaryn satyp alǵandyǵy týraly túbirtegin bilim berý uıymyna tapsyrady, - dedi A.Temirhanova. 

Onyń aıtýynsha, 1 tamyzda bastalyp, 30 qyrkúıekke deıin jalǵasatyn «Mektepke jol» respýblıkalyq aktsııasy aıasynda ár azamat halyqtyń áleýmettik az qamtylǵan toptarynan shyqqan balalardy mektepke daıyndaýǵa járdem berip, úles qosa alady.