Mektepke jol: Astanada 8500-den asa bala mektep jabdyqtaryn tegin alady
ASTANA. KAZINFORM — Astanada 2025-2026 jańa oqý jylynyń qarsańynda áleýmettik osal sanattaǵy balalardy qoldaýǵa baǵyttalǵan keshendi is-sharalar júzege asyrylyp jatyr, dep habarlaıdy qala ákimdigi.
Bilim basqarmasy basshysynyń orynbasary Serik Ádilbaevtyń sózinshe, bastamalardyń basty maqsaty — áleýmettik sebeptermen mektepke barmaı qalý jaǵdaılaryn boldyrmaý jáne bilim alýǵa teń qoljetimdilik jaǵdaıyn jasaý.
Memlekettik qoldaý sharalary
Tamyz aıynyń basynan bastap elordada áleýmettik osal sanattaǵy oqýshylarǵa mektep formasy, aıaq kıim jáne keńse taýarlaryn satyp alýǵa arnalǵan birjolǵy memlekettik kómek kórsetilip jatyr. 2025 jyly kómektiń mólsheri — ár balaǵa 46 228 teńgeni quraıdy. Jalpy 12 734 oqýshyny qamtý josparlanǵan. Ótinish pen qajetti qujattardy tikeleı mektepke tapsyrýǵa bolady.
Qabyldaý úderisi QR Oqý-aǵartý mınıstrliginiń № 158 buıryǵyna sáıkes júrgiziledi.
Kómekke ıe bolatyn sanattar Úkimettiń № 64 qaýlysymen bekitilgen. Onyń ishinde áleýmettik az qamtylǵan jáne kópbalaly otbasylardyń balalary, jetimder, tótenshe jaǵdaıdan zardap shekken balalar bar. Qazirgi ýaqytta 6 myńnan astam ótinish qabyldanǵan. Ótinish qabyldaý jalǵasyp jatyr. Buǵan deıin atamysh kómekti jyl saıyn 14 500-ge deıin bala alǵan.
«Mektepke jol» aktsııasy — demeýshilerden kómek
1 tamyz ben 30 qyrkúıek aralyǵynda el aýmaǵynda «Mektepke jol» atty respýblıkalyq qaıyrymdylyq aktsııasy ótip jatyr. Bıyl 8 500-den astam kópbalaly, áleýmettik az qamtylǵan otbasylardyń balalary men jetim balalardy qamtý josparlanyp otyr.
Kómek mektep sómkeleri men keńse taýarlary túrinde kórsetiledi. Buǵan metsenattar men áleýmettik seriktester demeýshilik etedi. Áleýmettik pedagogtar ásirese birinshi synyp oqýshylary men jańadan kelgen oqýshylardy qamtı otyryp, kómek alatyndardyń tizimin jasaýmen aınalysady.
Sonymen qatar ýchaskelik polıtsııa ınspektorlarymen birlesip, mektepke barmaı júrgen balalar men túngi ýaqytta eresekterdiń qaraýynsyz júrgen jasóspirimderdi anyqtaý maqsatynda reıdtik sharalar júrgizilip jatyr. Elorda mektepterinde ata-analardyń ótinishterin qabyldaý jalǵasyp keledi. 556920 nómiri boıynsha biryńǵaı jedel jeli jumys isteıdi, sondaı-aq ár mektepte senim telefondary men qoǵamdyq qabyldaý bólmeleri ashylǵan.
Arzan baǵadaǵy mektep jármeńkeleri
Astananyń barlyq aýdanynda 2-31 tamyz aralyǵynda mektep formasy men keńse taýarlary tómen baǵamen satylatyn mektep jármeńkeleri ótedi.
Olar ár apta saıyn qaladaǵy tanymal saýda oryndary men ashyq alańdarda uıymdastyrylady. Ata-analar jańa oqý jylyna aldyn ala daıyndalyp, otbasylyq bıýdjetke salmaq salmaı balalaryn jabdyqtaı alady.
Sondaı-aq, jármeńke aıasynda «Meıirimdi qoldar» aktsııasy ótkizilip jatyr. Bul áleýmettik jaǵdaıy tómen otbasylardan shyqqan oqýshylarǵa arnalǵan qaıyrymdylyq bastama.
«Meıirimdi qoldar» aktsııasy — qala turǵyndarynan balalarǵa kómek
Astanada dástúrli «Meıirimdi qoldar» aktsııasy bastaldy. Qala turǵyndary mektepke qajetti quraldardy (sómke, dápter, qalam, keńse taýarlary) arnaıy ornatylǵan konteınerlerge qaldyrý arqyly kómek kórsete alady.
Konteınerler qaladaǵy iri saýda ortalyqtary men dúkenderde qoıylǵan. Barlyq jınalǵan zattar mektepter men qoǵamdyq uıymdar arqyly qajetti balalarǵa taratylady.
Aktsııa qaladaǵy alty aýdandy qamtıdy, onyń ishinde «Mega Silk Way», «Arýjan», «Saryarqa», «Rahmet» SOO-lary bar.
Balalar qaýipsizdigi — basty nazarda
Astana qalasynyń Bilim basqarmasy jaz mezgilinde balalardyń qaýipsizdigine erekshe nazar aýdarý qajettigin eske salady. Ata-analarǵa terezelerge shekteý quralyn ornatý, jabdyqtalmaǵan sý qoımalarynda shomylýǵa jol bermeý, dári-dármekterdi balalar qoly jetpeıtin jerde saqtaý usynylady. Sondaı-aq, balalarǵa jol erejelerin jıi eskertip, oıyn alańdarynda olardyń qaýipsizdigin baqylaý mańyzdy.
Buǵan deıin elimizdiń ár óńirinde 30 qyrkúıekke deıin «Mektepke jol» qaıyrymdylyq aktsııasy ótetini habarlanǵan edi.